Qoor-Qoor oo loo doortay madaxweynaha Galmudug

753

Xildhibaanada cusub ee baarlamaanka Galmudug ayaa goor dhow madaxweynaha cusub ee Galmudug u doortay, Axmed Caddi Kaariye Qoor-Qoor, kadib markii uu guuleystay doorasho ka dhacday Dhuusamareeb.

Qoor-Qoor ayaa ku soo baxay wareegii koowaad ee doorashada, isagoo helay 66 cod, halka musharriixii kale ee ku xigay ee Cabdullaahi Axmed Samatar uu helay 9 cod.

Sidoo kale waxaa wareegaan ku haray Cabdiraxman Axmed Sabriye oo helay 1 cod iyo Axmed Shire Maxamed (Falagle) oo isna helay 1 cod.

Guddoomiyaha baarlmaanka Galmudug, Dr Maxamed Nuur Gacal oo ku dhawaaqay natiijada doorashada madaxweynaha cusub ee Galmudug ayaa shaaciyey inuu xil kaasi ku guuleystay Axmed Qoor, islamarkaana uu hoggaamin doono afarta sano ee soo socota.

Musharraxa guuleystay ee Qoor-Qoor oo ay wadatay dowladda federaalka ayaa horay loo sii ogaa inuu ku bixi doono doorashadaan.