Masuul hore oo caawa lagu dilay Muqdisho

1232

Kooxo hubeysan ayaa caawa nin shacab ah ku dilay xaafada Jungal oo ka tirsan degmada Yaaqshiid ee magaalada Muqdisho.

Marxuumka la dilay oo ka mid ahaa dadka degaanka ayaa magaciisa lagu sheegay C/kariin Shiikh Cilmi (Diikaa)

Wararka qaar ayaa sheegaya in marxuumka uu saddex sano ka hor Gudoomiye ka ahaa laanta Onkod oo ka tirsan waaxda Jungal ee degmada Yaaqshiid, balse hadda uu iska ahaa qof shacab ah oo aan wax shaqo ah heynin.

Raggii dilka geystay oo la sheegay iney ahaayeen labo nin oo bastoolado ku hubeysan ayaa goobta ka baxsaday, waxaana marxuumka oo dhaawac culus ahaa uu geeriyooday intii loo sii waday isbitaalka.

Lama oga illaa hadda sababta loo dilay, mana jirto cid sheegatay dilkiisa inkastoo falal noocan ah looga bartay kooxda Al-Shabaab oo dagaal kula jirta dowlada Somalia iyo cid kasta oo la shaqeysa.