{"id":192303,"date":"2026-06-26T12:03:52","date_gmt":"2026-06-26T09:03:52","guid":{"rendered":"https:\/\/wardoon.net\/so\/?p=192303"},"modified":"2026-06-26T12:14:01","modified_gmt":"2026-06-26T09:14:01","slug":"192303-2","status":"publish","type":"post","link":"http:\/\/wardoon.net\/so\/192303-2\/","title":{"rendered":"Madaxwayne Xasan Sheekh oo sheegay sababta xayiraadda fiisaha Midowga Yurub ee basaboorka Soomaaliga."},"content":{"rendered":"

\"\"<\/p>\n

Madaxweynaha Soomaaliya Xasan Sheekh Maxamuud ayaa ka jawaabay xayiraadaha cusub ee Midowga Yurub ku soo rogay muwaadiniinta Soomaaliyeed ee codsanaya fiisaha dalalka Schengen, isagoo sheegay in Soomaaliya aysan diidaneyn dib u soo celinta dadkeeda, balse ay ku adkeysaneyso in marka hore la xaqiijiyo qofka la celinayo inuu yahay muwaadin Soomaali ah.<\/p>\n

Hadalkan ayaa yimid kadib markii Golaha Midowga Yurub uu Khamiistii sheegay inuu xayiraado dhinaca dal-ku-galka ah ku soo rogay muwaadiniinta Soomaaliyeed, sababo la xiriira waxa uu ku tilmaamay wada-shaqeyn aan ku filneyn oo Soomaaliya kala sameyso dib-u-qaabilaadda muwaadiniinteeda sida sharci-darrada ah ku jooga dalalka Yurub.<\/p>\n

Madaxweyne Xasan Sheekh ayaa sheegay in khilaafka u dhexeeya Muqdisho iyo Brussels uusan ahayn in Soomaaliya diiddan tahay muwaadiniinteeda, balse uu salka ku hayo habka loo xaqiijinayo dadka la sheegayo in Soomaaliya lagu soo celinayo.<\/p>\n

\u201cWaxaan rabaa inaan u sheego Midowga Yurub iyo Soomaalida: maanaan diidin dadkeenna. Dadkeenna dalkan ayey leeyihiin, mana diidi karno,\u201d ayuu yiri Madaxweyne Xasan Sheekh.<\/p>\n

Wuxuu intaas ku daray in dowladda Soomaaliya ay su\u2019aal ka qabto dadka Yurub ay dooneyso inay Soomaaliya ku soo celiso, gaar ahaan marka aan si cad loo xaqiijin jinsiyaddooda.<\/p>\n

\u201cWaxaan su\u2019aal ka qabnaa oo keliya sida dadkaas loo soo celinayo. Qof kasta oo midabkeenna leh, muuqaalkeenna leh, oo Geeska Afrika ka soo jeeda ayaa magaceenna isku dhiibay si uu u helo magangalyo siyaasadeed,\u201d ayuu yiri.<\/p>\n

Muranka aqoonsiga
\nMadaxweynaha ayaa sheegay in Soomaaliya ay horey u aragtay kiisas dad lagu soo celiyay magaca Soomaali, balse markii ay dalka yimaadeen la ogaaday in aysan Soomaali ahayn.<\/p>\n

\u201cWaxaan waaya-arag u nahay dad la soo celiyay oo la yiri waa Soomaali, balse markii dalka ay yimaadeen aysan noqon Soomaali, Af-Soomaalina aysan aqoon, Soomaali-na aysan ahayn,\u201d ayuu yiri Xasan Sheekh.<\/p>\n

\u201cMarkii ay is-dhiibayeen waxay sheegteen inay Soomaali yihiin. Maanta waxaan taaganahay hal arrin: aan hubinno dadkaas, ma yihiin muwaadiniin ka tirsan Jamhuuriyadda Federaalka Soomaaliya? Intaas ayaan isku haynaa,\u201d ayuu raaciyay.<\/p>\n

Madaxweynaha ayaa sheegay in dowladda Soomaaliya ay dooneyso in muwaadiniinteeda sharciyada ku waayay Yurub ay dalka ku soo noqdaan, balse aan la aqbali karin in qof aan Soomaali ahayn lagu soo celiyo magaca Soomaaliya.<\/p>\n

Wuxuu sheegay in dowladda aysan jeclayn in Soomaalida ku dhibaateysan Yurub lagu daawado dhibaatada, balse ay muhiim tahay in dib-u-celintu ku dhacdo hannaan sax ah, sharci ah, oo lagu kala saarayo muwaadinka Soomaaliyeed iyo dadka kale ee sheeganaya magaca Soomaaliya.<\/p>\n

Xannibaadaha cusub
\nGolaha Midowga Yurub ayaa Khamiistii ku dhawaaqay tallaabooyin cusub oo si toos ah u saameynaya codsiyada fiisaha muddada-gaaban ee muwaadiniinta Soomaaliyeed.<\/p>\n

Tallaabada ugu weyn ayaa ah in dalalka xubnaha ka ah Midowga Yurub aysan hadda muwaadiniinta Soomaaliyeed siin karin fiisaha dhowrka jeer lagu galo dalalka Schengen, oo loo yaqaan multiple-entry visa.<\/p>\n

Sidoo kale, dalalka xubnaha ka ah Midowga Yurub ma fududeyn karaan shuruudaha caddeymaha looga baahan yahay dadka Soomaaliyeed ee codsanaya fiisaha. Taas waxay ka dhigan tahay in codsadayaasha Soomaaliyeed laga doonayo inay keenaan dukumentiyo buuxa oo caddeynaya ujeeddada safarkooda, halka ay ka deggan yihiin, awoodda dhaqaale iyo shuruudaha kale ee gelitaanka.<\/p>\n

Midowga Yurub ayaa sidoo kale meesha ka saaray dhaafitaanka khidmadda fiisaha ee dadka haysta baasaboorrada diblomaasiga iyo kuwa adeegga dowladda.<\/p>\n

Muddada caadiga ah ee lagu baari jiray codsiyada fiisaha ayaa iyaduna laga dhigay 45 maalmood, halka markii hore ay ahayd 15 maalmood.<\/p>\n

Golaha Midowga Yurub ayaa sheegay in tallaabadan ay tahay mid ku-meel-gaar ah, balse ma uusan sheegin waqti rasmi ah oo ay ku egtahay.<\/p>\n

Cadaadiska Brussels<\/p>\n

Midowga Yurub ayaa sheegay in qiimeyn ay sameysay Guddiga Yurub lagu ogaaday in Soomaaliya aysan si ku filan ugala shaqeyn dib-u-qaabilaadda muwaadiniinteeda aan sharciga ku lahayn dalalka Yurub.<\/p>\n

\u201cDalalka ay dadku ka soo jeedaan waa inay gutaan waajibaadkooda, haddii kale cawaaqib ayaa ka dhalan kara,\u201d ayuu yiri Magnus Brunner, Wakiilka Arrimaha Gudaha iyo Socdaalka ee Midowga Yurub.<\/p>\n

\u201cGo\u2019aanka maanta wuxuu muujinayaa hawlgelin iyo go\u2019aan dheeraad ah oo lagu gaarayo iskaashi wanaagsan oo dhinaca dib-u-qaabilaadda ah,\u201d ayuu raaciyay.<\/p>\n

Go\u2019aanka ka dhanka ah Soomaaliya ayaa qeyb ka ah cadaadis ballaaran oo Midowga Yurub ku saarayo dalalka aan si buuxda ula shaqeyn marka la doonayo in lagu celiyo muwaadiniintooda aan haysan sharci ay ku joogaan Yurub.<\/p>\n

Midowga Yurub ayaa horey tallaabooyin la mid ah ugu qaaday dalal ay ka mid yihiin Gambia iyo Itoobiya. Xannibaadihii lagu soo rogay Itoobiya sanadkii 2024 ayaa laga qaaday bishii May ee sanadkan, kadib markii Brussels ay sheegtay in Addis Ababa ay hagaajisay iskaashiga dib-u-qaabilaadda.<\/p>\n

\n