DHAGAYSO:-Xiisad siyaasadeed oo ka taagan dowlad deegaanka Soomaalida Itoobiya

555

 

Khilaaf ayaa soo kala dhex galayo dowlad deegaanka Soomaalida iyo dowladda Federaalka Itoobiya, taasoo dhalisay degenaansho la’aan siyaasadeed oo laga dareemay magaalada Jigjiga.

Madaxweynaha dowlad deegaanka Soomaalida Itoobiya Mustafa Muxumed Cumar ayaa labo jeer looga yeeray magaalada Addis Ababa ee Caasimadda Itoobiya.

Madaxweyne Mustafe ayaa la sheegay inuu la kulmay Madaxda Federaalka Itoobiya, iyagoo ka wada hadlay xiisada u dhaxeysa Qowmiyadaha Soomaalida iyo Oromada iyo arrimo kale.

Wararka ayaa sheegaya in Madaxweyne Mustafe uu la kulmay Golihiisa Wasiirada, isagoo warbixin siiyay.

Madaxweynaha dowlad degaanka Soomaalida Mustafe Muxumad Cumar ayaa xilka ka qaaday Mas’uuliyiin dhowr oo la sheegay in ay kasoo horjeedeen maalmihii lasoo dhaafay.

Kulankii golaha wasiiradda ee DDS waxaa xilkii looga qaaday koox lagarab ah axmed shide kuwaas oo kala ah.

1. Cabdi Xakiin Cigaal _ Madixii xarunta dhexe Ee Xisbigga.
2. Guleed Aw-cali wasiirkii warfaafinta DDS.
3. Cabdi Xukun Cali Dubad oo ahaa madixii Machadka farsamada ee DDS.
4. Cabdi Bile madaxii shirkada yar yar ee DDS.

Madaxweynaha dawlad deegaanka Soomaalida Itoobiya Mustafe Muxumed Cagjar ayaa Wasiirka Warfaafinta u magacaabey Cabdillaahi Maxamed Mowliid.

Awoodda Xisbiga ayaa u muuqata inay sababtay loollan adag oo u dhexeeya madaxweynaha deegaanka, Mustafa Cagjar, iyo Gudoomiha Xisbiga, Axmed Shide.

Shide waxaa uu ku xiran yahay dowladda federaalka Itoobiya, wuxuuna horay u soo noqday wasiirkii warfaafinta, haatanna waa wasiiraka maaliyadda ee dalka Itoobiya. Waxaa muuqata inuu saameyn badan ku leeyahay siyaasadda deegaanka.

Sidoo kale waxaa saaka lagu wadaa in shir isugu yimaadaan Golaha Wasiirada dowlad deegaanka Soomaalida Itoobiya, taasoo looga hadlayo xiisada siyaasadeed.

Madaxweyne Mustafe Cagjar oo xilka loo doortay bishii August ee sanadkii 2018 ayaa waxaa soo food saaray caqabado badan oo ku aadan sidii cadaalad loogu heli lahaa dadka tacadiyada kala kulmay Maamulkii hore ee deegaanka.

Dad badan ayaa walaac ka muujiyay khilaafka siyaasadeed ee soo kala dhex galay dowlad deegaanka Soomaalida iyo dowladda Federaalka Itoobiya.