Ra’iisul Wasaaraha XFS Mudane Maxamed Xuseen Rooble ayaa la kulmay taliyeyaasha Ciidammada Qalabka sida ee dalka, waxaana kulanka qayb ka ahaa Mas’uuliyiinta ugu sarraysa Ciidanka Dowladda qaybahooda kala duwan.
Kulanka ayaa waxaa diiradda lagu saaray xoojinta amniga dalka, ilaalinta xuquuqda muwaadiniinta, amniga doorashooyinka iyo dardargelinta howlgallada la dagaallanka Al-shabaab.
Kulanka waxaa goobjoog ka ahaa guddoomiye ku-xigeenka 1aad ee Golaha Shacabka ee BFS Mudane Cabdiweli Ibraahim Sh.Muuddey iyo mas’uuliyiin kale.
Horay Ra’iisul Wasaaraha Xukuumadda Fderaalka ah ee Soomaaliya Maxamed Xuseen Rooble ayaa ula kulmay Taliyaha KMG ah Hay’adda Nabad Sugidda iyo Sirdoonka Qaranka, Hoggaanka Maxkamadda Ciidammada Qalabka sida iyo Taliyeyaasha Nabad sugidda iyo Booliska Gobolka Banaadir.
isagoo faray Xeer Ilaalinta iyo maxkamadda Ciidammada Qalabka sida in ay baaritaan rasmi ah oo deg deg ah ku sameeyaan kiiska Ikraan Tahaliil Faarax.
Kulanka ayaa imaaanaya iyadoo ilaa iyo hadda aan xal laga gaarin arrinta Farmaajo iyo Rooble,kuwaasi xafiisyadooda kazoo kala saaray Warqado iska soo hor jeeda, kadib markii uu xilka ka qaaday Taliyihii Hay’adda Nabad sugidda iyo sirdoonka Qaranka Fahad yaasiin, waxaana il gaar ah lagu hayaa sida Taliyaha Cusubi uu howlihiisa u gudan doono, maaddaama Madaxweyne Farmaajo uu faray Fahad Yaasiin inuu shaqadiisa sii wato.
