Wararka laga helayo gobolka Shabeelaha Dhexe ee dowlad goboleedka HirShabelle ayaa sheegaya in haatan dagaal culus uu ka dhacay duleedka deegaanka Nuur Dugle oo ka tirsan gobolkaasi, kadib markii ay weerar ku qaadeen Al-Shabaab.
Weerarka ayaa waxaa xigay dagaal foolka fool ah oo u dhaxeeyo ciidamada dowladda iyo Al-Shabaabkii weerarka ku qaaday tuulada Huurweyne, kuwaas oo beegsaday saldhigyada ciidamada huwanta.
Ilo dadka deegaanka ah ayaa innoo sheegay in xaaladdu ay kacsan tahay, islamarkaana labada dhinac ay isku adeegsanayaan hubka noocyadiisa kala duwan.
Inta la xaqiijiyey waxaa dagaalkan ku dhintay illaa 10 qof, halka ay ku dhaawacmeen tiro lale intaasi ka badan, sida ay innoo sheegeen ilo wareedyo xilkas ah.
Saraakiilnka tirsan dowladda ayaa sheegay inay iska difaaceen weerarka, ayna khasaare gaarsiiyeen xubnihii soo qaaday, halka Al-Shabaab dhankeeda ay sheegtay inay dishay illaa 4 askari, sidoo kalena ay qabsatay 2 qoray.
Nuur Dugle ayaa ka mid ah deegaanadii u dambeeyey ee lagala wareegay kooxda Al-Shababaab, waxaana maalmo kahor deegaankan booqasho ku tegay madaxweyne Xasan Sheekh Maxamuud.
Shabeelaha Dhexe ayaa ka mid ah gobollada uu ka socdo kacdoonka ka dhanka ah Al-Shabaab, kaas oo deegaano badan looga qabsaday kooxda.
Ciidamada dowladda iyo kuwa deegaanka ayaa sheegaya in ujeedkooda uu yahay inay gaaraan illaa degmada Aadan Yabaal oo uu ku yaallo saldhigga ugu weyn ee Al-Shabaab.
