Xukuumada Somaliland ayaa Guddoomiyaha Golaha Wakiilada Somaliland Cabdirisaaq Khaliif Axmed, ku eedaysay in lacag loo dhiibay uu rasaas iyo shidaal u siiyay kooxaha dagaalka kula jira ciidamada Somaliland.
Wasiirka Warfaafinta Somaliland Saleebaan Yuusuf Cali Koore, oo warbaahinta la hadlay ayaa Khaliif ku eedeeyay in uu taageero dhaqaale siiyay ciidamo beeleedka dagaalka ku jira.
“Cabdirisaaq Khaliif hantidii halkan looga dhiibay ee loogu talo galay in mushkilada lagu xaliyo, ayuu u isticmaalay in uu dhanka kale shidaal iyo rasaas u siiyo” ayuu yidhi Wasiir Koore
Dhinaca kale, Wasiirku waxa uu Khaliif ku eedeeyay khaayinimo, isaga oo sheegay in uu waligiiba ka shaqaynayay hagardaamada Somaliland, isla markaana uu dhibaato badan u gaystay madaxbannaanida Somaliland.
“Cabdirisaaq Khaliif waxa uu caadaystay fikirkiisa uu kaga soo horjeeda qaranimada Jamhuuriyada Somaliland, in badan wuxuu isku dayay in uu qaranka khiyaamo, wuxuuna noqday qofka kali ah ee dhibaatadii meesha taalay sii laba jibaara, wax qaranka dan u ah kumuu talin” ayuu yidhi Wasiir Koore.
Waxa uu Khaliif ku eedeeyaay laba wajiilonimo, isaga oo sheegay in golihii wasiirada ee Laascaanood ku sugnaa uu u sheegi jiray in dhamaan garaadadu ay dowlada Soomaaliya ka tirsanyihiin iyo in kooxo ka tirsan Al Shabaab ay ka dagaalamayaan Laascaanood.
Wasiirku waxa uu ugu danbayntii, usoo jeediyay Golaha Wakiilada Somaliland, in ay xil ka xayuubin ku sameeyaan Khaliif hadii uu isagu is casili waayo, isagoo sheegay in uu jabiyay sharcigii uu guddoomiyaha ku ahaa.
