Guddoomiyihii urur siyaasadeedka Waabari Cabdirisaaq Ibraahin Ataash, ayaa sheegay in uu gabi ahaanba ka baxay siyaasadii Somaliland wuxuuna taageeray go’aamadii kasoo baxay shirkii garaadada dhaqanka ee Laascaanood.
Ataash oo waraysi siiyay wariye Cabdirisaaq Catoosh, ayaa ku baaqay in Somaliland ixtiraamto go’aankii garaadada dhaqanka ee ahaa in Somaliland ay ka baxdo deegaanadaas, isaga oo sheegay in Somaliland iyadu ogolaatay in shirka Laascaanood dhaco.
“Aniga waxay iila muuqdaan in lagu ixtiraamo go’aamadooda, wanan raacsanahay in lagu ixtiraamo, awalna way mudnayd hadana way mudantahay, Somaliland iyada ayaa ogolaatay, mar hore iyo mar danbeba” ayuu yidhi Taash.
Waxa uu sheegay in doonista shacabka reer Sool aan xoog lagu joojin karin, loona baahanyahay in la helo si kale oo xal lagu gaadhi karo, lakiin hada ciidamada laga saaro gobolka.
“Qadiyadaydu way caddahay oo waxa weeyaan in dagaalkaana deg deg loo joojiyo ciidamada meeshaa joogana deg deg looga soo qaado, oo gobolka laga soo saaro, ciidamada waxan ku talinaya in la geeyo magaalada Oog” ayuu yidhi Taash.
Ataash waa guddoomiyihi labaad ee urur siyaasadeed ee siyaasada Somaliland iska casila tan iyo markii ay bilaabantay xasarada magaalada Laascaanood, hore waxa isku casilay guddoomiyihii ururka Shacabka Saleebaan Ciise Axmed Xagla Toosiye.
