Afhayeenka xisbiga talada Somaliland haya ee Kulmiye ayaa sheegay in dadka reer Laascaanood ay yihiin reer Somaliland isla markaana anay jirin dookh kale oo ay haystaan.
Cabdinaasir Muxumed Xasan Buuni, oo waraysi kooban siiyay Horyaal TV, ayaa ka jawaabay hadal uu siyaasi Cabdiraxmaan Cabdishakuur ku sheegay in dadka reer Laascaanood aan lagu khasbi karin midnimada Somaliland.
“Hadii aduu markii aad wasiirka ahayd aad ku iibisay badii Soomaaliya dookh aad leedahay, shacbiga Somaliland, doc ahaana shacbiga Laascaanood malaha dookh, waxay qaateen rabitaan 1991” ayuu yidhi Buuni.
Waxa uu sheegay in Shakuur aanu hadalkiisa dowlada Soomaaliya ku matalayn, oo uu ahaa hadal uu si shakhsi ah u yidhi, wuxuuna ku tilmaamay shakhsi baal madow kaga jira taariikhda Soomaalida.
Buuni waxa uu dowlada Soomaaliya uga mahadceliya in anay Shakuur xil wasiir siinin, isaga oo sheegay in uu bada Soomaaliya iibiyay mar uu wasiir noqday.
Siyaasi Cabdiraxmaan Cabdishakuur ayaa qoraal uu dhawaan ku baahiyay bartiisa Facebook ku dhaliilay habka ay Somaliland u wajahday colaada Laascaanood, isaga oo sheegay in reer Laascaanood aan lagu qasbi karin midnimada Somaliland.
