Dowladda Soomaaliya ayaa doonaysa in ay Cabdixakim Maxamed Axmed u magacawdo safiirka cusub ee u fadhiya dalka Yemen, halkaas oo uu saldhig ka dhigan doono caasimadda ku-meel-gaarka ah ee Cadan.
30-kii Diseembar, Wasaaradda Arrimaha Dibadda Soomaaliya ayaa warqad u dirtay mas’uuliyiinta Yemen oo arrintan ku saabsan, taasoo ay aragtay majaladda Africa Intelligence, waxaana ay sugayaan ansixintooda.
Tallaabadan ayaa ku soo beegmaysa xilli Saciid Cabdullaahi Deni, madaxweynaha maamul-goboleedka Puntland, uu ku dhibtoonayo sidii uu isugu keeni lahaa beelo-hoosaadyada kala duwan ee maamulkiisa si ay uga qeyb qaataan dagaalka kooxda Daacish. Deni uma badna in uu ku farxo qorshaha Muqdisho, maadaama Cabdihakim Axmed uu yahay nin ay muddo dheer xafaaltamayeen.
Safiirka cusub ee la magacaabay oo sidoo kale loo yaqaano Dhoobo-Daareed, ayaa ka soo jeeda beesha Warsangali oo ka tirsan beel-weynta Harti-Daarood, taasoo si weyn uga dhex muuqata guud ahaan waqooyiga Soomaaliya, ilaa cirifka Puntland.
Xafiiltanka labada nin ayaa soo bilowday xilligii Maxamed Cabdullaahi Maxamed Farmaajo uu ahaa madaxweynaha Soomaaliya. Daareed, oo markaas ahaa guddoomiyaha baarlamaanka Puntland, ayaa xilka laga qaaday sanadkii 2019-kii ka dib markii uu la shaqeeyay Muqdisho isagoo ka soo horjeeda danaha Deni, kaasoo dhowr bilood ka hor xilligaas la wareegay hoggaanka maamulka Puntland.
Tan iyo markaas, Daareed wuxuu isku dhoweynayay maamulka hadda jira iyo Ra’iisul Wasaaraha Federaalka, Xamza Cabdi Barre, isagoo ujeedkiisu yahay inuu xakameeyo saamaynta siyaasadeed ee madaxweynaha Puntland.
Haddii loo xaqiijiyo safiirka Yemen, tani waxay dhibaato ku noqon kartaa Deni, maadaama Daareed uu door muhiim ah ka ciyaari doono inuu mas’uuliyiinta Soomaaliya la socodsiiyo dariiqyada sahayda iyo isgaarsiinta ee ay isticmaalaan Xuutiyiinta iyo taageerada ay siiyaan Daacishta Soomaaliya.
Magacaabista dowladda federaalka Soomaaliya ee nin ay si aad ah isku hayaan, wuxuu sidoo kale Saciid Deni u arkaa daan-daansi iyo in ay Villa Somalia sii xoojineyso dagaalka ka dhanka ah madaxweyaha Puntland.
