Warar kala duwan ayaa kasoo baxaya toogasho maanta loo gaystay Allaha u naxariistee Taliyihii Guutada 14-ka October, Gaashaanle Nuur Maxamed Gaabow (Nuur Farey) oo lagu dilay duleedka degmada Afgooye ee gobolka Shabeelaha Hoose.
Ilo wareedyo xilkas ah ayaa innoo sheegay in taliyaha xilliga la dilayay uu ku sugnaa deegaan u dhow Afgooye oo ay joogaan ciidamada dowladda, waxaana rasaas ku furay nin hubeysan oo ku labisnaa dareeska ciidamada, taas oo keentay in isla goobta uu ku geeriyoodo marxuumka.
Wararka ayaa intaasi kusii daraya in ninka gaystay falkan isna goobta lagu dilay, waxaana dhacdadan ka dhashay hadal-heyn xoogan.
Ma cadda sababta uu ninka hubeysan u dilay taliyaha iyo inuu askariga yahay, waxaana haatan socda baaritaanno ay wadaan laamaha ammaanka ee dowladda Soomaaliya.
Ma jiro wax hadal ah oo kasoo baxay taliska ciidanka Xoogga dalka oo ku aadan dilka Taliyaha Guutada 14-ka October, waxaana la filayaa in taliska uu ka hadlo.
