Amniga guud ee deegaannada SSC-Khaatumo, gaar ahaan magaalada Laascaanood, ayaa la adkeeyay, iyadoo la kordhiyay goobaha baaritaanka gaadiidka si loo xaqiijiyo nabadgelyada.
Kulamo amniga lagaga hadlayay ayaa ka dhacay Laascaanood, waxaana hoggaamiyay madaxda maamulka SSC-Khaatumo, oo ay ka mid yihiin guddiga amniga iyo taliska booliska.
Mas’uuliyiintu waxay warbixin ka soo saareen xaaladda amniga, dadaallada lagu xasillinayo deegaannada, ka hortagga fal-dambiyeedyada iyo la dagaallanka maandooriyaha. Waxaa sidoo kale la sheegay in ciidamada booliska iyo nabad-sugidda ay si joogto ah u wadaan hawlgallo amni xaqiijin ah.
Hoggaanka SSC-Khaatumo ayaa ku adkeeyay hay’adaha ammaanka inay sii xoojiyaan dadaallada lagu sugayo amniga, isagoo ballan-qaaday in maamulka uu dhiirrigelinayo tayaynta ciidamada.
Tallaabooyinkan lagu adkaynayo amniga ayaa kusoo beegmaya xilli warar soo baxaya ay sheegayaan in Ra’iisul Wasaaraha Soomaaliya, Xamza Cabdi Barre, uu safar ku tagi doono deegaannada SSC-Khaatumo.
Safarka Xamza ee Laascaanood
Ra’iisul Wasaaraha Soomaaliya, Xamza Cabdi Barre, iyo wafdi uu hoggaaminayo ayaa lagu wadaa inay dhawaan u ambabaxaan magaalada Laascaanood, xarunta maamulka KMG ah ee SSC-Khaatumo.
Ra’iisul Wasaare Xamza ayaa maalmaha soo socda u bixi doona Laascaanood, halkaas oo uu ku tagi doono booqasho indho-indheyn ah, sida ay innoo xaqiijiyeen ilo-wareedyo xilkas ah oo ku dhow xafiiska ra’iisul wasaaraha.
Ujeedka safarka Xamza Cabdi Barre ayaa la xiriira xoojinta xiriirka dowladda dhexe iyo maamulka SSC-Khaatumo, si loo sii ambaqaado howlaha harsan ee maamulkaasi oo weli KMG ah, isla markaana wajahaya xaalado dagaal.
Sidoo kale, wararka ayaa intaasi kusii daraya in ra’iisul wasaaruhu uu kulamo la qaadan doono madaxda maamulkaas iyo qaybaha kala duwan ee bulshada, isagoo ka xog-wareysan doona horumarka deegaanka, xaaladaha ka jira iyo baahiyaha gaarka ah.
Waxaa kale oo uu qorshuhu yahay in Ra’iisul Wasaare Xamza uu dhagax-dhigo mashaariic horumarineed oo lagu taageerayo dib-u-dhiska iyo horumarka deegaannada SSC-Khaatumo, kuwaas oo haatan laga hirgelinayo deegaannada maamulkaasi KMG ah.
Diidmada Somaliland ee safarka Xamza
Somaliland ayaa ku hanjabtay in Ra’iisul Wasaare Xamza uu ka qoomamayn doono booqashadiisa magaalada Laascaanood, oo haatan ah xarunta maamulka KMG ah ee SSC-Khaatumo.
Somaliland, oo si weyn uga hortimid qorshaha Ra’iisul Wasaare Xamza ee safarkiisa Laascaanood, ayaa sidoo kale ka digtay booqashadan, waxayna sheegtay inuu la xiriirayo arrimo siyaasadeed iyo hurinta colaadda ka taagan gobolka.
Guddoomiyaha gobolka Sool ee Somaliland, Axmed Faarax Cismaan, ayaa Xamza ku eedeeyay inuu Laascaanood geynayo mashruuc hurinaya colaadda Sool iyo Sanaag. “Ra’iisul Wasaare Xamza wuxuu rabaa inuu Laascaanood yimaado, isaga oo wata mashruuc dagaallo looga hurinayo Sanaag iyo Sool,” ayuu yiri.
Wuxuu intaas ku daray: “Waxaan uga digayaa ninka Ra’iisul Wasaaraha Soomaaliya ku magacaaban inuu ka qoomamayn doono hagardaamada iyo mashruuca dagaal ee uu mar labaad u soo wado shacabka gobollada Sool iyo Sanaag.”
Ugu dambayntii, wuxuu hoosta ka xariiqay in Xamza iyo Xasan Sheekh ay yihiin raggii ka dambeeyay dagaalladii ka dhacay Laascaanood, welina ay faraha kula jiraan xiisadda gobolka.
Si kastaba ha ahaatee, socdaalka Xamza ayaa la filayaa inuu caddeeyo mowqifka dowladda federaalka Soomaaliya ee ku aaddan taageerada maamulka KMG ah ee SSC-Khaatumo, oo haatan ay xiisad dagaal kala dhaxayso Somaliland.
