Siyaasiga Cabdiraxmaan Dheere oo ah gacan yaraha la-taliyaha amniga qaranka Fahad Yaasiin Xaaji Daahir ayaa waayey kursiga xildhibaanimo ee beeshiisa, kaas oo uu tirsigiisu yahay HOP#124, islamarkaana yaalla Kismaayo.
Cabdiraxmaan Dheere oo kursigan ku fadhiyey 12-kii sano ee lasoo dhaafay ayaa sameeyey isku dayo iyo dadaallo xoogan si dib loogu doorto, balse uma suuragelin, waxaana ka adkaaday isaga iyo kooxda Fahad Yaasiin hoggaamiye Axmed Madoobe.
Ninkan oo isaga oo xildhibaan ahaa ku shaqeynayey sarkaal ka tirsan NISA ayaa sidoo kale isku dayey inuu kursiga kasoo wareejiyo deegaan doorashada Kismaayo, balse waxaa kasoo horjeestay beeshiisa oo ku gacan seertay damaciisa ah in loo weeciyo magaallo kale.
Doorashada kursiga HOP#124 ayaa waxaa lagu wadaa in la qabto maalinta Isniinta ah ee soo socota, waxaana loo xiray musharrax lagu magacaabo Maxamed Nadiif, kaas oo Cabdiraxmaan Dheere uga horreeyey kursiga, wuxuuna ahaa xildhibaan 2004 illaa 2012.
Nadiif oo haatan qaatay shahaadada musharaxnimada ayaa sidoo kale ka mid ah siyaasiyiinta caanka ah ee kasoo jeeda deegaanada Jubbaland, wuxuuna mar isku soo taagay xilka madaxweynaha, walow aan la ogeyn kooxda uu haatan ka tirsan yahay.
Dhanka kale guddiga SEIT ee Jubbaland ayaa shaaciyey guddiga soo xulaya kuraasta kala ah HOP#124 iyo HOP#029, iyada oo gabi ahaan tartanka laga reebay C/raxmaan Dheere.
Si kastaba, gacan yaraha Fahad Yaasiin ayaa arrintan u eersaday kaalintiisii ku aadaneyd dagaalkii ay Villa Somalia la gashay Jubbaland, kadib dib u doorashadii Axmed Madoobe.
