Guddoomiyaha Xisbiga mucaaradka ah ee UCID ee Somaliland, Faysal Cali Waraabe, ayaa ku eedeeyay Madaxweynaha Somaliland Muuse Biix Cabdi inuu wado qorshe uu dib ugu dhigayo doorashada, kuna sameysan muddo kordhin.
Faysal Cali Waraabe, oo shir jaraa’id ku qabtay magaalada Hargeysa ayaa sheegay in labada xisbi ee mucaaradka ah “WADDANI iyo UCID”, aysan marnaba aqbali doonin in dib loo dhigo doorashada Madaxtooyada, una aqoonsan doonin Muuse Bixii Madaxweyne haddii waqtigiisu dhamaado.
“Muuse waxaan leeyahay, hadaad diido inaan kula tartanno, Marka wakhtigaagu dhamaado, ma oggolaanayno inaad sii fadhido, labada xisbi ma ogolaanayaan, kamana talinaysid halka ay joogaan taageerayaashayadu”
Guddoomiye Faysal Cali Waraabe ayaa sheegay in 1994-tii uu Muuse Biixi uga digay inuu dalka dagaal galiyo, kaddib xariir uu kala soo sameeyay dalka Finland, balse taas uu ka dhaga adeegay uuna Somaliland galiyay dagaal, isagoo intaas ku daray aysan marnaba aqbali doonin in xisbiyada uu meesha ka saaro.
“Muuse Biixi, 1994-kii ayaan Finland kalasoo hadlay, waxaan ku idhi dalka dagaal ha galin, waakii galiyay iyadoon Cigaal ogayn, ilaa laga qaaday xilkii Wasiirnimana dalku muu dagin”.
“Muuse Biixi wuxuu damcay in uu doorashada dib u dhigo, oo uu Xisbiyada meesha ka saaro, oo uu lasoo baxo laba xisbi oo uu ka guulaysan-karo”.
