Hantidhowraha Guud ee Qaranka Soomaaliya, Axmed Ciise Guutaale, ayaa soo bandhigay warbixin dhameystiran oo laga diyaariyay baaritaanno xagga maaliyadda ah oo lagu sameeyay qaar ka mid ah hay’adaha dowladda iyo mashaariicda lala xiriirinayo ururo caalami ah.
Axmed Ciise Guutaale ayaa soo bandhigay in Maxkamadaha dalka ay diideen in la baaro, lacagta ay qaadaanna aysan ku shubin Qasnada Dowlada Soomaaliya, Warbixinta ayaa lagu sheegay in 24 hay’adood oo dowladeed loo qorsheeyay in la baaro, balse 21 kaliya la baaray.
Hanti Dhowre Axmed Ciise Guutaale ayaa xusay in 3 hay’adood oo kala ah Maxkamadda Sare, Maxkamadda Gobolka Banaadir iyo Maxkamadda Racfaanka Gobolka Banaadir ay si cad u diideen in baaritaan lagu sameeyo.
Sida uu sheegay Hantidhowre Guutaale, hay’adahan ayaa lagu eedeeyay in ay si sharci darro ah u maamuleen lacag dhan $1,089,998.76, taasoo laga qaaday dad rayid ah iyadoo aan la heyn sharci caddaynaya sababta loo ururiyay.
Waxaa kale oo warbixinta lagu xusay in gawaari deeq ah oo loogu talagalay safaaradda Soomaaliya ee dalka Cumaan ay si qarsoodi ah u qaateen xildhibaano iyo saraakiil ka tirsan Wasaaradda Arrimaha Dibadda.
Arrintan ayaa si weyn u dhaawacaysa sumcadda dowladda Soomaaliya, iyadoo deeqihii dibadda loogu talagalay adeegga dadweynaha ay noqdeen kuwa la leexsado.
Sidoo kale Axmed Ciise Guutaale ayaa shaaca ka qaaday in Hay’adda Qaramada Midoobay ee WFP (World Food Programme) lagu eedeeyay in aysan si habboon u maareyn mashaariicda loogu talagalay dadka rayidka ah ee ay ka waddo gudaha Soomaaliya.
Inkasta oo hay’addu ay sheegto inay caawiso dadka nugul, haddana baarista Hantidhowraha ayaa muujisay in aanay jirin habraacyo daah-furan oo lagula xisaabtamo sida loo fuliyo mashaariicdaas.
Warbixintu waxay sidoo kale si adag u tilmaantay in ay jiraan 57 markab iyo 17 doonood oo si sharci darro ah uga kalluumeysanaya biyaha Soomaaliya, iyada oo aan dowladda Federaalka ayan qaadin wax tallaabo ah ilaa hadda, Arrintani oo khatar weyn ku tahay khayraadka dabiiciga ah ee dalka iyo dhaqaalaha bulshada xeebaha ku nool.
