Taliyaha Ciidanka Xoogga dalka Soomaaliyeed Sarreeye gaas Daahir Aadan Cilmi Indha qarshe ayaa ka hadlay tirakoobka ciidamada xoogga dalka isagoo sheegay in ujeedada laga leeyahay ay tahay in la helo tirada saxda ah ee ciidanka, si loogu qorsheeyo hub, gaadiid, qalab iyo dhaqaale ku filan.
S/gaas Daahir Aadan Cilmi Indha qarshe ayaa xusay in dawladda Soomaaliya ay ka go’an tahay in la kordhiyo miisaaniyada ku baxda ciidanka xoogga dalka, si taasi loo hirgeliyana loo baahan yahay in la ogaado tirada saxda ah ee ciidanka.
Waxa uu tilmaamay in askari xanuunsan ama tababar iyo fasax ku maqan maahee askarta kale looga baahan yahay in ay xaadir ku ahaadaan goobta dawladda ay ku ogtahay, isaggoo xusay in khalad ay tahay in fasax la’aan laga maqnaado tiro koobka ciidanka lagu wado.
Taliyaha Ciidanka Xoogga dalka ayaa amray saraakiisha ciidanka in ay fuliyaan amarada taliska, islamarkaana ay dardar geliyaan shaqada, si askari walba xaquuqdiiisa uu u helo.
Ugu dambeyn S/gaas Daahir Aadan Cilmi Indha qarshe ayaa tilmaamay in Ciidanka Xoogga dalka markasta uu u taagan yahay in Ummadda Soomaaliyeed uu ka badbaadiyo khatar walba oo dalka gudahiisa ama dibadiisa ah, ayna u dhaarteen in dalkooda ay nafta u huraan.
Hase yeeshee taliyaha ciidamada xoogga dalka ayaan soo hadal qaadin ciidamada gadooday eek u kala sugan deegaano ka mid ah gobolada Sh/hoose iyo Sh/dhexe.
Ciidamada gadoodsan ee maanta ka soo baxay saldhigyadii ay ka joogeen qaar kamid ah degmooyinka gobolka Sh/dhexe ayaa ah kuwo hore loo tirakooba lagana qaaday sawir iyo faro sida ay sheegeen qaar kamid ah saraakiisha ciidamada dowlada
