Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabullaahi wuxuu tacsi tiiraanyo leh u dirayaa qoyska, qaraabada, ehelada iyo dhammaan ummadda Soomaaliyeed gaar ahaan bahda Fanaaniinka geeridii ku timid Alle ha u naxariistee, Khadiijo Maxamuud Yuusuf (khadiijo Qalanjo) oo muddo dheer ka mid ahayd hobollada Qaranka Waabari oo maanta geeriyootay.
“Alle ha u naxariistee Khadiijo Qalanjo, waxa ay ahayd Fannaanad wayn, jilaa iyo majaajilayste caan ku ah filimada Hiddaha iyo dhaqanka, suugaanta, nabadda iyo horumarinta dhaqanka Soomaaliyeed, waxayna ka mid ahayd Fannaaniintii Qaranka ee dalkeenna u soo hooyay billado iyo fanka Soomaaliyeed uu caan noqdo, lagana xiiseeyo masraxyada iyo tiyaatarrada caalamka iyo Gudahaba”
Guddoomiyuhu waxa uu xusay in Khadiijo Qalanjo ay ka mid ahayd haldoorka bulshada Soomaaliyeed ee dadaalka ku bixisay wacyi-gelinta bulshada iyo kobcinta garaadka da’yarta Somaaliyeed, iyadoo waqtigeedii iyo hibadeedii faneed u hurtay sidii uu dadkeennu xagga fanka uga muuqan lahaa masraxyada caalamka, wuxuu Marxuumadda Alle uga baryey inuu hoygeeda ka yeelo Jannatul Fardowsa, samir iyo iimaanna uu ka siiyo qoyska, ehelada iyo guud ahaan ummadda Soomaaliyeed ee ay ka geeriyootay.
