Xildhibaanada Baarlamaanka Puntland oo goor dhow kulan deg deg ah ku yeeshay xaruntooda magaalada Garoowe ayaa xilka ka qaaday Guddoomiyihii Baralamaanka Puntland C/xakiin Dhoobo Daarood ka dib mooshin laga keenay.
Illaa 49 ka mid ah 53 xildhibaan oo kulanka soo xaadiray ayaa cod gacan tag ah ku ansixiyey in xilka laga qaado Gudoomiyaha Baarlamaanka Puntland Cabdixakiin Dhoobo Daarood, waxaana ka aamusay 4 xildhibaan.
Guddoomiye Dhooba-daarood ayaa hoolka Baarlamaanka aan ku sugnayn xiliga codaynta xilka qaadistiisa loo samaynayey.
44 xildhibaan ayaa mooshinka ka guydbiyey Dhoobo Daareed, kuwaas oo guddoomiyaha ku eedeeyay arrimo badan oo xasaasi ah oo horseedi karay xil ka xayuubin.
Waxaa eedeymaha ka mid ahaa; in uu xarunta golaha soo dhoobay malayshiyaad uu soo urursaday, islamarkaana uu jebiyay qodobka 55-aad ee xeer-hoosaadka golaha Wakiilada, sida ay qoraalka u dhigeen.
Sidoo kale, waxay ku eedeeyeen “in uu ilaalo hubaysan la soo galay hoolka shirarka ee Baarlamanka, in lala soo galo hub iyo ciidan, in uu awooddii golaha uga faa’idaystay sida uu jecel yahay iyo in uu jebiyay 59-aad ee Dastuurka Puntland oo sheegaya in ay wada-shaqeeyaan saddexda hay’adood ee dowladda si sharciga waafaqsan.”
Xildhibaannada ayaa sidoo kale xusay in guddoomiyuhu uu lumiyay dhex-dhexaadnimadii gudaha Baarlamanka, iyagoo ku eedeeyay in uu eex iyo xad-gudub ku sameeyo xildhibaanada aan isaga la fikirka ahayn.
Guddoomiye ku-xigeenka koowaad ee Baarlamanka Puntland Cabdicasiis Cabdullaahi ayaa ku dhawaaqay guddi 7-xubnood ah oo diyaarinaysa doorashada Guddoomiyaha Cusub ee Baarlamaanka oo dhacaysa 14-ka bishan sida uu sheegay.
