Guddiga doorashada maamulka Hirshabeelle ayaa shaaciyay liiska 13 kursi oo ka mid ah kuraasta Golaha Shacabka Baarlamaanka 11-aad ee dalka, kuwaas oo deegaan doorashadoodu tahay magaalada Baledweyne ee xarunta gobolka Hiiraan.
Kuraasta 13-ka kursi ah ee la shaaciyay qaarkood waxaa ku jira kuwo ay ku fadhiyaan siyaasiyiin miisaan culus ku dhex leh siyaasayada Soomaaliya, waxaana jira welwel badan oo ay qabaan Musharaxiinta qaar oo ku aadan in loo boobo kuraasta shaqsiyaad gaar ah oo la wato.
13 kursi ee doorashadooda dhawaan lagu qabanayo Baledweyne ay kala aha HOP 003, oo uu hadda ku fadhiyo Maxamuud Cabdiraxmaan Beenebeene, HOP 006, oo uu ku fadhiyo Maxamuud Cabdullaahi Axmed, HOP 008, oo uu dhowrkii sano ee la soo dhaafay ku fadhiyay Dr Xuseen Cabdi Cilmi, HOP 015, oo ay ku fadhiso Xiis Xasan Aadan, HOP 022, oo uu ku fadhiyo Cusmaan Maxamed Cabdi, HOP 031 oo uu dhowrkii sano ee la soo dhaafay ku fadhiyay Yuusuf Xuseen Axmed Gama’diid.
HOP 032 oo uu ku fadhiyo wasiirka Wasaaradda Ganacsiga iyo Warshadaha Xukuumadda Khaliif Cabdi Cumar, HOP 068, oo ay ku fadhiso Faadumo Faarax Ibraahim, HOP 074, oo uu ku fadhiyo Cabdullaahi Colaad Rooble, HOP 086, oo uu ku fadhiyo Faarax Sheekh Cabduqaadir, waxuuna kursiga doorashadiisa ka mid yahay kuwa ugu xasaasisan, iyada oo uu u sharaxan yahay sanadkan la taliyaha Amniga Qaranka ee Farmaajo Fahad Yaasiin Xaaji Daahir, HOP 109, oo uu ku fadhiyo Wasiir kuxigeenka Wasaaradda Gaashaandhigga Cabdifitaax Qaasim Maxamuud, HOP 252, oo uu ku fadhiyo Cabdicasiis Saalax Carmaan iyo HOP 274, oo ah kursiga 13-aad waxaana ku fadhiyo Maxamed Cabdullaahi Xasan Nuux.
Maamulka Hirshabeelle ayaa noqonaya maamulkii labaad ee shaaciya doorashada kuraasta taala deegaan doorashada labaad ee doorashooyinka Golaha Shacabka, waxaana maamulkii ugu horeeyay noqday Koonfur Galbeed oo Baraawe ku qabatay doorashada13 kursi, waxaana la filayaa in maalmaha soo socda la qabto doorashada 13-ka kursi ay shaaciyeen guddiga doorashada Hirshabeelle.
