Doorashada kursiga tirsigiisu yahay HOP#030 Golaha Shacabka Baarlamanka 11-aad ee dowladda Federaalka Soomaaliya ayaa Maanta ka dhacday Magaalada Baladweyne ee Xarunta Gobolka Hiiraan ee dowlad Goboleedka Hirshabeelle.
Doorashada kursiga HOP#030 ayaa waxaa ku tartamay laba Musharax oo kala ahaa Cali Cabdullahi Xeefow iyo Daahir Amiin Jeesow oo sanadihii lasoo dhaafay ku fadhiyey kuraasigaas doorashadiisa Maanta lagu qabtay Baladweyne.
Daahir Jeesow ayaa ku guuleystay oo kusoo baxay mar kale kursiga OP#030 Golaha Shacabka Baarlamanka 11-aad ee dowladda Federaalka Soomaaliya, waxaana loogu coddeeyay qaab gacan taag ah, kadib markii uu tanaasulay Musharaxii la tartami lahaa.
Guddiga doorashada Hirshabeelle ayaa shaaciyey in Daahir Amiin Jeesow oo loo qaaday Codka kalsoonida ee ergada oo ay soo xaadireen 101 Ergay ayaa waxuu helay 101 Cod oo ah dhammaan cododka ergaydii soo xaadirtay.
Doorashada kuraas kale ayaa ka socota Magaalada Baladweyne ee Xarunta Gobolka Hiiraan, waxaana Maanta oo khamiis ah la qorsheeyay in Magaaladaas ay ka dhacdo doorashada saddex kursi oo kamid ah kuraasta harsan ee taalla Baladweyne.
