Ciidamada ammaanka Itoobiya ayaa xabsiga dhigay Sarreeye Guuto Guesh Gebre, oo hore u ahaa taliyihii Ciidanka Militariga Qaybta 15-aad, sida ay xaqiijiyeen ilo-wareedyo gudaha.
Sarkaal sare oo ka tirsan ciidamada ayaa sheegay in tallaabadan loo qaaday si waafaqsan sharciga, isagoo xusay in aanay jirin cid ka sarreysa xeerarka, taasina ay sabab u tahay xarigga lagula kacay sarkaalkan.
Sarreeye Guuto Guesh Gebre ayaa lagu yaqaanay mowqifkiisa ka dhanka ah qaar ka mid ah hoggaanka ciidamada ee taageeray shirweynihii guud ee TPLF.
Waxa uu si cad u dalbanayay in wax laga beddelo maamulka ku-meel-gaarka ah ee Tigray, kaas oo uu hoggaamiyo Getachew Reda. Doodahaas darteed, waxaa shaqada laga joojiyay tan iyo bishii Janaayo ee sannadkii hore.
Xafiiska Nabadgelyada iyo Amniga ee Tigray ayaa habeenimadii Sabtida ku shaaciyay bartiisa Facebook in ay qaadeen tallaabooyin sharci ah oo ka dhan ah xubno lagu eedeeyay ku xadgudub anshaxa iyo shuruucda ciidanka.
Xafiisku wuxuu sidoo kale tilmaamay in qaar ka mid ah hoggaamiyeyaasha ciidamada ay ku lug leeyihiin falal ka baxsan nidaamka, inkastoo uusan magacyadooda shaacin.
Dhankiisa, Getachew Reda ayaa qoraal uu ku daabacay bartiisa X ku muujiyay diidmo uu ka qabo xarigga Guesh Gebre, oo ay xabsiga dhigeen ciidamada ammaanka ee gobolka Tigray.
Wuxuu sheegay in Guesh lagu yaqaanay geesinimo iyo doorkii uu ka qaatay xilliyadii adkaa ee dagaalka, gaar ahaan dadaalkii uu ku joojinayay kala-daadashada ciidamada Tigrayga.
Getachew ayaa su’aal geliyay sababta loo xiray sarkaal sannad ka hor xilka si aan caddaalad ahayn looga qaaday, isaga oo xusay in eedeymaha la xiriira gacan saar lala sameeyay cadow ay yihiin kuwo aan la hubin.
Waxa uu intaa ku daray in arrintan lagu bartilmaameedsaday Guesh iyo kooxdiisa sababo la xiriira mowqifkooda siyaasadeed.
“Tigraay tuugta in la soo qabto ay yihiin kuwa qafaalanaya geesiyaal magac ku leh bulshada ayadoo marmarsiiyo laga dhiganayo sharciga ayaa ah mid ka soo horjeedda jiritaankeeda. Cid kasta oo daneynaysa Tigrayga waa inay ka hortagtaa dambiilayaasha,” ayuu yiri.
Waxaa la xaqiijiyay in Sarreeye Guuto Guesh Gebre ay gacanta ku dhigeen ciidamada ammaanka, iyadoo la sheegay in kiiskiisa loo gudbin doono maxkamadda ciidamada qalabka sida ee dalkaas.
