Madaxweyne Ku-xigeenka Puntland, Ahna Kusimaha Madaxweynaha Axmed Cilmi Cismaan Karaash ayaa ka hadlay warar sheegaya in Maamulka Somaliland uu cunoqabatayn saarayo gobolka Sool.
Axmed Karaash ayaa ku tilmaamay wax lalayaabo oo khibrad darro maamul cunaqabateyn la sheegay in uu madaxweynaha Somaliland saarayo gobolka Sanaag.
Kusimaha Madaxweynaha oo ka hadlay arrintaasi ayaa sheegay inaanay cidina cuna qabatayn saari karin ‘DHULKA AWOOWAYAASHA’ ee gobolka Sanaag, sida uu hadalka u dhigay.
“Arrin aan maqlay oo Muuse Biixi la yiri cunaqabatayn ayuu ku soo rogay Sanaag, arrin lalayaabo weeye, Cunaqabatayn mana saari karo, Alle ‘SWC’-na ma saarin. Waxaan farayaa Hay’ddaha uu beenta u sheegayey iyo dowladda Puntland-ba in si deg deg ah looga hortago arrintaasi been abuuur ka ah”. Ayuu yiri Axmed Karaash.
Sidoo kale kusimaha Madaxweynaha Puntland ayaa ku eedeeyay in Somaliland taageerto argagixisada Al-Alshabaab.
”Shabaabka uu leeyay Dhahar ayay joogaan, Shabaab Puntland ma joogto mana taageerto, Shabaab iyo Puntland waa kuwa dagaalku ka dhexeeyo har iyo habeenba, waxaanu leenahay meesha lagu badbaadiyo waa Soomaaliland, xariiq ma gaarsiin reer Burco iyo reer Hargeysa iyo Jeegaanta Midna, halkanna dagaalka ka dhex socda waad la socotaan, markaa Shabaab anagu ma haynee halkaas ayay jiraan, Soomaliland ayaa laga soo taakuleeya.” Ayuu yiri Madaxweyne Karaash.
Si kastaba, ma jirto wali wax war ah oo ka soo baxay dhinaca Somaliland oo la xiriirta hadalka ka soo yeeray madaxweyne Kuxigeenka maamulka Puntland, iyadoo dhowr jeer oo hore labada dhinac ay hadallo kul kulul ay Warbaahinta isu mariyeen.
