Nin u dhashay dalka Ciraaq oo dhowr jeer kitaabka Qur’aanka kariimka ah ku gubay dalka Sweden ayaa geeriyooday, sida uu Khamiistii sheegay garsoore ku sugan magaalada Stockholm.
Warbaahinta Sweden ayaa ku warrantay in lagu dilay toogasho ka dhacday magaalo u dhow caasimadda Sweden.
Salwan Momika, oo 38 jir ahaa, ayaa sannadkii 2023-kii dalka Sweden ka geystay dhowr fal oo ah gubid iyo xurmo ka qaadis ka dhan ah kitaabka barakaysan ee Islaamka.
Muuqaallada gubista Qur’aanka ayaa si weyn loogu faafiyey caalamka, waxaana ay caro iyo dhaleecayn xooggan ay ka dhex abuureen dhowr dal oo Muslimiin ah, taasoo sababtay rabshado iyo qalalaase ka dhacay meelo badan.
Maxkamadda Degmada Stockholm ayaa sheegtay in xukun la qorsheeyay Khamiista maanta ah oo ku saabsanaa dacwad uu Momika eedaysane ka ahaa dib loo dhigay, sababtoo ah mid ka mid ah eedaysanayaasha ayaa geeriyooday.
Garsoore ka tirsan maxkamadda, Göran Lundahl, ayaa xaqiijiyay in qofka geeriyooday uu yahay Momika. Wuxuu sheegay inuusan haynin wax macluumaad ah oo ku saabsan goorta iyo sida uu Momika u geeriyooday.
Booliisku waxay sheegeen in habeenkii Arbacada lagu wargeliyay toogasho ka dhacday dhismo dabaq ah oo ku yaal Sodertalje, oo u dhow Stockholm, ayna heleen nin qaba dhaawacyo rasaas. Ninka ayaa markii dambe geeriyooday, waxaana la furay baaritaan horudhac ah oo ku saabsan dilka.
Warbaahinta SVT ayaa sheegtay, iyadoo soo xiganeysa ilo-wareedyo aan la magacaabin, in qofka geeriyooday uu ahaa Momika. Waxay intaa ku dartay in Momika uu yimid Sweden isagoo ka yimid Ciraaq sannadkii 2018, lana siiyay sharciga deganaanshaha saddexda sano ah sannadkii 2021.
Dacwad-oogayaashu waxay sheegeen in shan qof la xiray habeenimadii Arbacada, sida ay sheegtay wakaaladda wararka Sweden ee TT.
Ra’iisul Wasaare Ulf Kristersson ayaa sheegay in adeegga ammaanka ee Sweden uu ku lug lahaa baaritaanka arrintan, sababtoo ah “waxaa iska cad inay jirto khatar ah in falkan uu xiriir la leeyahay awood shisheeye,” sida ay sheegtay TT.
Momika ayaa ku dooday in dibad-baxyadiisu ay bartilmaameedsanayeen diinta Islaamka, ee aysan ahayn dadka Muslimiinta ah. Wuxuu ku dooday inuu doonayay inuu ka ilaaliyo dadka Sweden farriimaha Qur’aanka.
Booliiska Sweden ayaa oggolaaday bannaanbaxyadiisa, iyagoo sabab uga dhigay xorriyadda hadalka, iyadoo isla markaasna dacwado ka dhan ah lagu soo oogay.
Bishii Maarso ee la soo dhaafay, ayaa lagu xiray dalka deriska la ah ee Norway, ka dib markii uu sheegay inuu halkaas magangelyo ka doonanayo, waxaana dib loogu celiyay Sweden, sida ay sheegtay TT.
Momika iyo eedaysane kale ayaa bishii Agoosto lagu soo oogay dacwad ah hurinta nacaybka, sababo la xiriira hadallo ay jeediyeen oo la xiriiray gubista Qur’aanka. Xukunka ayaa la filayay in la soo saaro subaxnimadii Khamiista.
