Wasiirka Difaaca Pakistan, Khawaja Asif, ayaa markii ugu horreysay si cad u sheegay xaaladda keeni karta in Pakistan ay militari ahaan uga qeyb gasho iska horimaad kasta oo Sacuudiga kala dhex gala Xuutiyiinta Yemen, iyadoo la dhaqan gelinayo heshiiska difaaca wadajirka ah ee Maka.
Khawaja Asif oo xalay wareysi siiyay telefishinka Pakistan ee Geo News ayaa sheegay in Pakistan ay fulin doonto waajibaadka ka saaran heshiiska haddii Sacuudiga uu la kulmo weerar aan sabab lahayn ama haddii dagaalka Yemen uu ku fido gudaha dhulka Sacuudiga.
“Haddii Sacuudiga lagu soo qaado weerar aan sabab lahayn, ama dagaalka Yemen uu ku fido Sacuudiga, Pakistan waxay dhaqan gelin doontaa Heshiiska Maka. Arrintaas shaki kama jiro,” ayuu yiri wasiirku.
Wuxuu sheegay in Pakistan ay si rasmi ah uga go’an tahay ilaalinta heshiiska, isla markaana ciidamadeeda loo adeegsan karo fulinta waajibaadka heshiiska haddii xaaladdu sidaas noqoto.
“Heshiiska Maka wuxuu dhigayaa in haddii mid ka mid ah saddexda dal ee heshiiska ku jira la weeraro, loo arko in dhammaantood la weeraray. Sidaas darteed, heshiiskani waa heshiis ay Sacuudiga, Pakistan iyo Turkigu isku difaacayaan,” ayuu yiri Khawaja Asif.
Wasiirka ayaa sidoo kale ka hadlay xiriirka Xuutiyiinta iyo Iiraan, isagoo sheegay in taageerada ay Iiraan ka hesho shacabka Yemen iyo Muslimiin badan oo dunida ah ay tahay arrin la ogyahay, balse aysan taasi sabab u noqon karin in kooxo hubeysan ay weeraraan Sacuudiga.
“Dadka Yemen iyo Muslimiin badan oo dunida ah waxay jecel yihiin oo taageeraan Iiraan. Taas waan ognahay. Laakiin haddii kooxo hubeysan oo aan dowlad ahayn ay khilaafka u dhexeeya Iiraan iyo dal kale uga faa’iideystaan inay Sacuudiga weeraraan, kooxahaas waa inay ogaadaan in tallaabadaas ay dhibaato weyn kala kulmi karaan,” ayuu ku daray.
Hadalka Wasiirka Difaaca Pakistan ayaa imaanaya xilli ay sare u kacayaan walaacyada laga qabo in colaadaha gobolka Bariga Dhexe ay ku fidaan dalal kale, iyadoo heshiiska difaaca wadajirka ah ee Maka uu noqon karo qodob muhiim ah haddii Sacuudiga uu si toos ah u wajahayo weerar dibadeed.
