Wasiirka Warfaafinta Puntland Cabdullaahi Cali Xirsi Timacadde ayaa sheegay in shirka uu Farmaajo ku baaqay aysan tegayn illaa inta ay martiqaad ka helayaan Beesha Caalamka.
Wasiirka ayaa ku baaqay in Beesha Caalamku diyaariso shir ku saabsan Arrimaha doorashooyinka Soomaaliya, kaasoo dhexmara dhinacyada siyaasadd dalka.
Dhinaca kale, War qoraal ah oo fiidnimadii Talaadada ka soo baxay madaxtooyada Puntland, ayaa loogu baaqay wakiilada Beesha Caalamka, in ay qaataan doorka diyaarinta shir lagu dhammaystirayo heshiiskii 17-kii September, si dalka looga qabto doorasho nabdoon oo wadar-ogol ah.
“Dowladda Puntland waxay bogaadineysaa kaalinta Beesha Caalamka, waxayna ugu baaqeysaa wakiilada Beesha Caalamka in ay qaataan doorka diyaarinta shir lagu dhameystirayo heshiiskii 17 September, si dhaqso Dalka looga hirgaliyo doorasho nabad ah, wadar oggolna ah.” ayaa lagu yiri qoraalka
Baaqan ayaa soo baxay, wax yar kadib markii Ra’iisul wasaare Rooble ka horyimid mudda kordhintii dowladda Federaalka, islamarkaana ku dhawaaqay in xukuumaddiisu diyaar u tahay hirgelinta doorasho ku salaysan heshiiskii 17-kii September.
