Horraantii toddobaadkan, Wasiirka Arrimaha Dibadda Sacuudiga, Amiir Faysal bin Farhan, ayaa kula kulmay dhiggiisa Masar, Badr Abdelatty, shirka Dhaqaalaha Adduunka ee Davos, Switzerland. Sida ay sheegtay Wasaaradda Arrimaha Dibadda Sacuudiga, labada wasiir waxay ka wada hadleen “arrimo badan oo dan wadaag ah”.
Waxaa aad loo rumeysan yahay in ay ka wada hadleen martiqaadkii Madaxweyne Donald Trump ee Golaha Nabadda (Board of Peace), oo ay horey u aqbaleen, iyo sidoo kale faahfaahinta heshiis difaac oo cusub oo u dhexeeya Sacuudiga iyo Masar.
Waxaa intaa dheer, Madaxweynaha Soomaaliya Xasan Sheekh Maxamuud ayaa la filayaa inuu maalmaha soo socda u safro Sacuudiga, halkaas oo uu kula saxiixi doono heshiis difaac oo dhex mara Muqdisho iyo Riyaad.
Haddii Soomaaliya lagu daro heshiiska Sacuudiga iyo Masar, isbahaysiga saddex-geesoodka ah wuxuu xoojin doonaa saameynta Sacuudiga iyo Masar ee dhinaca Afrika ee marin-biyoodka istaraatiijiga ah ee Bab al-Mandab, oo isku xira Badda Cas, Gacanka Cadmeed iyo Badweynta Hindiya.
Warbaahinta Bloomberg ayaa sidoo kale werisay in Turkigu xiiseynayo inuu ku biiro heshiiska difaac ee istiraatiijiga ah ee u dhexeeya Sacuudiga iyo Pakistan, kaas oo la saxiixay Sebtembar 2025.
Heshiiskan saddex-geesoodka ah, oo ay qaar ku naaneyseen “NATO Islaami ah”, ayaa isku dari kara awoodda nukliyeerka Pakistan, maalgelinta Sacuudiga iyo xoogga milatari ee Turkiga. Khabiirka Talyaaniga ah ee siyaasadda iyo juqraafi-siyaasadda, Sergio Restelli, ayaa qoray in isbahaysigani uusan noqon doonin mid magac uun ah, balse uu mideynayo awood nukliyeer, marinno badeed istiraatiiji ah, ciidan dibadeed iyo saameyn ideolojiyadeed, taas oo abuuri karta xudun amni oo ka fidsan Bariga Dhexe ilaa Badweynta Hindiya.
Si kastaba ha ahaatee, khabiirka London ku sugan ee Sami Hamdi ayaa sheegay in dhaq-dhaqaaqyadan ay salka ku hayaan hoos u dhaca kalsoonida Mareykanka ee difaaca gobolka. Wuxuu xusay in 2019 Mareykanku uusan wax tallaabo ah qaadin kaddib weerarkii Xuutiyiintu ku qaadeen xarumaha shidaalka Sacuudiga, iyo in 2025 Israel ay weerartay hoggaanka Xamaas ee Doha.
Dhanka kale, khilaafaad siyaasadeed ayaa sii kordhaya oo u dhexeeya Sacuudiga iyo Imaaraadka Carabta, gaar ahaan ku lug lahaanshahooda colaadaha Suudaan iyo Yemen. Sacuudigu wuxuu duqeymo ka fuliyay Yemen, halka Imaaraadkuna lagu eedeeyay inuu taageero xoogagga Rapid Support Forces ee Suudaan.
Isla waqtigaas, Imaaraadku wuxuu heshiis ballaaran la saxiixday Hindiya, kaas oo ka dhigay Hindiya macmiilka ugu weyn ee gaaska iyo lammaanaha ugu dhow ee dhinaca nukliyeerka.
Sami Hamdi ayaa sheegay in heshiiska Imaaraadka iyo Hindiya uusan ahayn mid milatari oo keliya, balse uu yahay farriin siyaasadeed oo muujinaysa in Imaaraadku doonayo inuu muujiyo miisaankiisa caalami ah xilli ay jiraan kala aragti duwanaansho kala dhaxeysa Riyaad.
Si kastaba, khabiirad la yiraahdo Cinzia Bianco ayaa sheegtay inaysan filaynin in khilaaf dhab ah oo qoto dheer uu ka dhex qarxo Sacuudiga iyo Imaaraadka, maadaama labaduba ay xulafo la yihiin Mareykanka, isla markaana ay ku wada jiraan hindisaha nabadeed ee Trump.
Gebogabadii, falanqeeyayaashu waxay isku raacsan yihiin in fikradda “NATO Islaami ah” ay wax yar buunbuunin tahay, isla markaana heshiisyadan cusub ay inta badan diiradda saarayaan is-dhexgalka tignoolajiyadda iyo in dalalku helaan madax-bannaani amni oo ka madax bannaan ku tiirsanaanta buuxda ee Mareykanka.
