Qarax goor-dhow ka dhacay agagaarka deegaanka Lafoole ee gobolka Shabeellaha Hoose, ayaa lagu dilay taliyihii ciidamada booliska degmada Afgooye.
Qaraxa oo ka dhacay inta u dhaxeysa Xaawa Cabdi iyo Lafoole ayaa waxaa ku dhintay Dhamme Cabdulqaadir Cismaan Nuunow iyo saddex ka mid ah ilaaladiisa.
Gudoomiyaha gobolka Shabeellaha Hoose Ibraahim Cali Aadan ayaa xaqiijiyay geerida taliyaha, waxaana uu sheegay in laamaha Ammaanka ay waddaan baaritaano.
“Alle ha u naxariisto Taliyihii Saldhiga Booliska Degmada Afgooye Captan Cabdiqaadir Cismaan Nuunow iyo Mujaahidiinti la socotay ee galabta ku shahiiday qarax argagixisada ay la eegteen gaari ay saarnaayeen, janada fardowso allaha ka waraabiyo Aamin Aamin” ayuu yiri Gudoomiyaha.
Goobjoogayaasha ayaa sheegay in qaraxaasi uu ka dhashaya miino lagu aasay waddada dhinaceeda oo ka dhacay jidka isku xira Afgooye iyo Muqdishu.
Taliyaha la dilay Dhamme Cabdulqaadir Cusmaan Mursal Nuunow ayaa in muddo ah soo hoggaaminayey ciidamada booliiska ee magaalada Afgooye.
Kooxda Al-Shabaab ayaa sheegatay mas’uuliyadda qaraxa, waxaana qoraal kasoo baxay lagu yiri “”Mujaahidiinta ayaa qarax ku dilay Taliyihii Booliska degmada Afgooye iyo 5 askari oo ilaala u ahaa.”
