Jabhadda TPLF ee dagaalka kula jirta dowladda Itoobiya, ayaa oggolaatey in Midowga Afrika ay gadh wadeen ka noqdaan wada hadalada u dhaxayn doona iyaga iyo dowladda Itoobiya.
TPLF horey waxay ugu gacan saydhay wada hadallo kasta oo ay ku jiraan Midiwga Afrika, iyagoo xilligaa rabay in wada hadallada ay qayb ka noqdo dalka Kenya.
Balse TPLF waxay dhex dhexaadinta Midowga Afrika ku dareen kuwo heer caalami ah oo qayb ka noqda wada hadallada la rajaynayo inay dhex maraan TPLF iyo dowladda Itoobiya.
Dhinaca kale TPLF waxay iskeed u sheegtay in xabbad joojin ay samaynayaan ku qotonta munaasabadda sannadka cusub ee Itoobiya oo shalay ilaa maanta laga xusayo guud ahaan dalka Itoobiya.
Dalka Eritariya Ciidamadiisa oo qayb ka ah dagaalka ka soconaya dalka Itoobiya, ayaa kamid ah waxyaabaha ay inta badan ka cabanayaan kooxda TPLF, maadaama deris ay yihiin gobolka Tigray iyo dalka Eritariya isla markaana TPLF ay aaminsan yihiin in dhul Tigray leedahay ay haystaan Eritariya.
Geesta kale warar aan Warbaahinta lala wadaagin ayaa sheegaya in dalka Jabuuti uu wada hadal ku dhex marayo TPLF iyo dowladda Itoobiya.
Dagaalka u dhaxeeya kooxda TPLF iyo dowladda Itoobiya oo muddo dheer socday ayaa maalmahan sidii hore ka qaboobaa, iyadoo guud ahaan dalka Itoobiya laga xusayay sannadka cusub ee 2015 tirsi taariikheedka u gaarka ah dalka Itoobiya.
