Madaxweynaha Ukraine, Volodymyr Zelensky, ayaa sheegay in Mareykanku doonayo in dagaalka u dhexeeya Ukraine iyo Ruushka la soo afjaro bisha Juun, isaga oo xusay in labada dhinacba lagu casuumay wadahadallo nabadeed oo lagu wado in ay ka dhacaan Mareykanka toddobaadka soo socda.
Zelensky wuxuu sheegay in Mareykanku markii ugu horreysay soo jeediyay in kooxaha wada-xaajoodka Ukraine iyo Ruushka ay ku kulmaan gudaha Mareykanka, suurtagalna ay tahay in kulankaasi ka dhaco magaalada Miami. “Annagu waan xaqiijinay ka-qaybgalkeenna,” ayuu yiri.
Ilaa hadda wax faallo ah kama soo bixin Washington iyo Moscow, balse Madaxweynaha Mareykanka, Donald Trump, ayaa tan iyo markii uu mar kale xilka la wareegay in ka badan hal sano ka hor si weyn ugu dadaalayay in la soo afjaro colaadda u dhexeysa labada dal.
Dhanka kale, Ruushku wuxuu sii wadaa weerarrada uu ku beegsanayo kaabayaasha tamarta ee Ukraine, taasoo sababtay koronto-go’ ballaaran, xilli dalkaasi wajahayo cimilo aad u qabow.
Hadallo uu Zelensky sii daayay Sabtidii, ayuu ku faahfaahiyay wareeggii labaad ee wadahadallada nabadeed ee Mareykanku dhexdhexaadinayay, kuwaas oo Jimcihii ku dhammaaday Abu Dhabi, iyada oo aan wax horumar ah laga gaarin.
Madaxweynaha Ukraine wuxuu sheegay in qodobbada ad-adag ay weli taagan yihiin, gaar ahaan cadaadiska lagu saarayo Ukraine in ay sameyso tanaasulaad dhuleed. Wuxuu sidoo kale xusay in markii ugu horreysay laga wada hadlay suurtagalnimada kulan saddex-geesood ah oo ay yeeshaan hoggaamiyeyaasha dalalka ay khusayso, halkii ay ka ahaan lahaayeen wakiillo kaliya, balse wuxuu carrabka ku adkeeyay in arrintaasi u baahan tahay diyaar-garow dheeraad ah.
