Weriye Cumar Maxamed Soomane oo dhawaan ku biiray howl-wadeenada madaxtooyada Puntland ayaa caawa lagu xiray magaalada Garowe ee xarunta maamulka Puntland.
Soomane ayaa ahaa weriyaha gaarka ah ee madaxweynaha Puntland Saciid Cabdullaahi Dani, waxuuna u shaqa bilaabay bartamihii bishii dhamaatay ee Janaayo.
Cumar Soomane ayaa sidoo kale ka tirsanaa shaqaalaha Idaacadda Kulmiye, waxaana la sheegay in weriyaha loo heysto laba war oo ka baxay Idaacaddaas, kuwaas oo isagu uu uga diray Garowe.
Weriyaha ayaa shaqada madaxtooyada laga rukhseeyay habeen ka hor, waxaana caawa laga xiray maqaaxi ku taalla gudaha magaalada Garowe, xilli uu la fadhiyey weriyaal kale.
Labada warbixin ee loo heysto weriyahaas ayaa kala ah, mid ku saabsaneyd ciidamada Somaliland oo kuwa Puntland kala wareegay gacan ku heynta degmada Boocame ee gobolka Sool, taas oo maalmo ka hor ka baxday Idaacadda iyo warbixin ku saabsaneyd arday reer Puntland ah oo Muqdisho u aaday in ay galaan imtixaanka dowladda federaalka, si shahaado loo siiyo.
Puntland ayaan weli wax war ka soo saarin xariga Weriye Cumar Maxamed Soomane caawa loogu geystay magaalada Garowe ee xarunta maamulka Puntland.
Cumar Soomane ayaa shalay Facebook-giisa kusoo qoray raali gelin la xiriirta warbixinta ka baxday KNN ee la xariirtay ardayda Muqdisho u aaday inay galaan imtixaanka dowladda, taas oo uu ku tilmaamay mid uu ku fududaaday, waxaana jiray cadaadis uu saacadii lasoo dhaafay uu weriyuhu kala kulmayey masuuliyiinta madaxtooyada Puntland.
