Madaxweynihii hore ee Galmudug, Mudane Axmed Ducaale Geelle (Xaaf) ayaa si kulul u dhaleeceeyey shirarka Muqdisho uga socdo musharraxiinta mucaaradka ee diidan guddiyada doorashooyinka.
Xaaf ayaa sheegay in shirkan uusan aheyn mid xalaal ah oo aysan ka soo bixi doonin natiijo dan u ah shacabka Soomaaliyeed, isagoo xusay iney ku kulmeen shaqsiyaad Kursi doon ah oo kaliya.
“Madaxda qaar ee shirka fadhiso horey ayaa loo soo tijaabiyey wax ay dalkan u qabteen malaha” ayuu yiri Xaaf oo si gaar ah farta ugu fiiqay Xasan Cali Khayre RW hore ee Somalia.
“Shirka ka socda Muqdisho xalaalba maahane muxuu shir ka noqonayaa, Hadiiba ay ka qeyb galayaan shaqsiyaad uu ka mid yahay Ra’iisul Wasaarihii hore Xasan Cali Kheyre oo inta Ciidamo ii dalbaday xilkeygii iga soo ceyrsadey” ayuu yiri Axmed Ducaale Geelle (Xaaf).
Mar uu ka hadlayey diidmada ay musharaxiintu ka muujinayeen guddiyada doorashooyinka ayuu sheegay Xaaf in kaliya ay wadaan mar-marsiiyo iyo inay carqaladeeyaan doorashada soo socota.
“Waala wada ogaa sidii ay ahaayeen guddiyadii uu sanadkii 2016 magacaabay Xasan Sheekh oo ay ku jireen shaqaale ka tirsanaa xafiiskiisa” ayuu yiri Xaaf.
