Ra’iisul wasaaraha xukuumadda Soomaaliya, Mudane Xamza Cabid Barre iyow wafdi uu hoggaaminayo ayaa lagu wadaa in dhowaan u ambabaxaan magaalada Laascaanood ee xarunta maamulka KMG ah ee SSC-Khaatumo.
Warar soo baxaya ayaa sheegaya in Xamza uu maalmaha soo socda u bixi doono Laascaanood, halkaas oo uu ku tagi doono booqasho indho-indheyn ah, sida ay ay innoo xaqiijiyeen ilo wareedyo xilkas ah oo ku dhow xafiiska ra’iisul wasaaraha Soomaaliya.
Ujeedka safarka Xamza Cabdi Barre ayaa sidoo kale la xiriira xoojinta xiriirka dowladda dhexe iyo maamulka SSC-Khaatumo, si loo sii amba qaado howlaha harsan ee la xiriira maamulkaasi oo weli KMG ah, isla markaana weli wajahayo xaalado dagaal.
Sidoo kale wararka ayaa intaasi kusii darayo in ra’iisul wasaaruhu uu kulamo la qaadan doono madaxda maamulkaas iyo qaybaha kala duwan ee bulshada oo uu ka xog wareysan doonaan horumarka deegaanka, xaaladaha ka jira, gaar ahaan baahiyaha gaarka ah..
Waxaa kale oo uu qorshuhu yahay in ra’iisul wasaare Xamza uu dhagax-dhigo mashaariic horumarineed oo lagu taageerayo dib-u-dhiska iyo horumarka deegaannada SSC-Khaatumo, kuwaas oo haatan laga hirgelinayo deegaannada maamulkaasi.
Socdaalka wafdigan sare ee uu hoggaaminayo ra’iisul wasaaraha ayaa sare u qaadaya maqaamka maamulka SSC-Khaatumo oo weli dowladda federaalka ay u aqoonsan tahay mid ku meelgaar ah, tan iyo markii uu dagaal adag la galay maamulka Somaliland.
Socdaalkan ayaa sidoo kale la filayaa inuu caddeeyo mowqifka dowladda federaalka Soomaaliya ee ku aaddan taageerada maamulkaasi iyo horumarinta gobollada SSC.
Qaban-qaabada loogu jiro soo dhaweynta Xamza iyo wafdigiisa ayaa sidoo kale si weyn looga dareemayaa Laascaanood oo xarun u ah maamulka SSC, waxaana maamulka iyo shacabka ay u diyaar garoobayaan inay qaabilaan wafdiga ka socda dowladda dhexe.
Magaalada Laascaanood ee uu haatan tegayo ra’iisul wasaare waxaa horay uga dhacay dagaallo culus oo u dhexeeyay maamulada Somaliland iyo SSC Khaatumo, kuwaasi oo ay dad badan ku geeriyoodeen, welina xiisadda labada maamul ayaa ka taagan gobollada Sool iyo Sanaag ee waqooyiga Soomaaliya.
Si kastaba, waxaa horay deegaannada SSC-Khaatumo booqashooyin ugu tegay wasiirro iyo xildhibaanno ka tirsan dowladda federaalka, balse ka soo jeedo deegaannadaasi.
