Tababaraha Kooxda Arsenal ee Unai Emery ayaa qarka in laga caydhiyo shaqada tababaranimo ee Arsenal kadib guuldaradii Europa League ee Emirates ka soo gaadhay.
Maamulka Arsenal ayaa la sheegayaa in ay maanta oo jimce ah saacadaha soo socda kulmi doonaan iyada oo laga yaabo in tababare Emery laga caydhiyo shaqada ka hor kulanka Norwich City ee Axada.
Wargayska The Sun ayaa sheegaya in shaqada kooxda si ku meel gaadh ah loogu dhiibi doono caawiyaha tababare Emery ahna halyeeyga kooxda ee Freddie Ljungberg.
Waxa xalay si weyn u madhnaa garoonka Emirates kaas oo ay taageerayaasha Arsenal iska diideen in ay yimaadaan ciyaarta iyaga oo ku doodaya in shaqada laga caydhiyo tababare Emery.
Arsenal ayaan wax guul ah gaadhin kulankii 6-aad oo xidhiidh ah tartamada oo dhan iyaga oo aan wax guul ah gaadhin tan ilaa 6 bishii October.
Gunners ayaa haatan isku diyaarinaysa kulanka ay la ciyaari doonaan kooxda Norwich City kulan ka tirsan premier League.
