Ciidamo ka tirsan DF ayaa galabta vrasaas ku furay gaadiid uu la socday Madaxweynihii hore ee Somalia Xassan Shiikh Maxamuud xili ay marayeen degmada Xamar weyne ee gobolka Banaadir
Sida Wararku sheegayaan ciidamada dowlada ee ku sugan Kontrolka Maxkamada gobolka Banaadir ayaa rasaas culus riday xili ay goobta ka gudbayeen gaadiidka gelbinayey Madaxweyne Xassan Shiikh oo halkaas marayey, kuwaasoo ka yimid dhinaca xeebta Liido.
Rasaas ayaa argagax gelisay shacabka degan degmooyinka Xamar jajab iyo Xamar-weyne.
Ilaalada la socotay gaadiidkan ayey wararku sheegayaan ineysan ka jawaabin rasaasta ka dib markii uu sidaas amar ku siiyey Xassan Shiikh, lamana sheegin wax khasaare ah oo ka dhashay rasaastaas.
Wasiirkii hore ee amniga gudaha, Cabdirisaaq Maxamed oo sidoo kale ah mudane ka tirsan baarlamaanka, oo kamid ahaa mas’uuliyiintii la socotay kolonyadii la xabadeeyay ee madaxweynihii hore ee Soomaaliya, Xasan Sheekh Maxamuud, ayaa ka hadlay arrintaas.
Cabdirisaaq ayaa isku-day dil ku tilmaamay rasaastii ay ku fureen ciidamada dowladda Kolonyo Gawaari ah oo la socotay Xasan Sheekh, xili ay marayeen agagaarka xarunta Maxkamadda gobolka Benaadir ee degmada Xamar Weyne.
Waxa uu ra’iisal wasaaraha xukuumadda xil-gaarsiinta ka dalbaday in dhacdadaas uu ku sheegay isku-deyga dil ee ka dhanka ahaa madaxweynihii hore ku sameeyo baaris deg-deg ah.
“Rooble waa inuu baara isku-deyga dil ee ka dhanka ah madaxweynihii hore Xasan Sheekh. Taasi oo dhacday 40-daqiiqo ka hor. Aniga qudheyda waxaan la safrayay madaxweynaha oo aan wehliyo taliyihii hore ee NISA Sanbaloolshe. Waa daan-daansi aan la aqbali karin oo ka dhan ah madaxweynaha,” ayuu yiri.
