Wasiirka arrimaha dibadda Soomaaliya Axmed Macallin Fiqi ayaa shaaciyay in ciidamada Masar ay saddex bilood gudahood ku imaanayaan Soomaaliya.
Sidoo kale wuxuu sheegay in haatan uu socdo wada-hadal farsamo oo looga hadlayo sidii loo saldhigi lahaa ciidamada ka imaanaya Masar iyo Itoobiya, si ay qayb uga noqdaan AUSSOM.
“Ciidamada Masar iyo Itoobiya ee ku biiraya AUSSOM waxaa socda wada-hadal farsamo, saddex bilood gudahood ayay dalka ku imaan doonaan,” ayuu yiri wasiirka arrimaha dibadda Soomaaliya Axmed Macallin Fiqi.
Wasiir Fiqi ayaa tilmaamay in Itoobiya meel iska dhigtay heshiiskii xad-gudubka ahaa kadib wada-hadalkii labada dhinac ee Ankara ku dhex-maray, sidaas darteedna aysan jirin sabab loogu diido kamid noqoshada howlgalka cusub.
“Xafiiska nabadda iyo ammaanka ayay codsi u gudbisteen, wixii farsamo hadda farsamadeeda way socotaa, Itoobiya sidii hore ciidamo ah meesha ma joogaan, shardigii dowladda ay ku xireysayna ma jiro oo xiligii loo qabtay kahor ayay ka laabteen.”
Dowladda Masar ayaa muddooyinkii dambe si weyn u daneynaysay kamid noqoshada howl-galka cusub, xilli ay Itoobiya ku sigatay in laga reebo howl-galka, wallow ay markiiba dambe isfaham la gaartay dowladda federaalka Soomaaliya.
Si kastaba, howl-galka AUSSOM oo haatan dalka ka bilowday ayaa lagu qiimeyn doonnaa waxyaabaha uu kusoo kordhiyo Soomaaliya, maadaama dalal cusub lagu soo kordhiyay halka askarta howl-galkaan qeybta ka ah ay si toos ah ula howl-gali doonaan ciidamada dowladda federaalka Soomaaliya.
