Madaxweynaha Uganda, Yoweri Museveni, ayaa sheegay in Uganda ay xaq u leedahay in ay gaadho Badwaynta Hindiya isagoo dalalka leh xeebaha ee Afrika ku eedeeyey iney noqdeen kuwo “danaystayaal” ah oo moodaya in badahooda ay iyaga oo keliya leeyihiin..
Museveni ayaa sheegay in haddii dowladaha leh badda ay diidaan in ay la wadaagaan marinada badda, isla markaana ay ku adkaystaan fikirka ah in baddu ay iyaga u gaar tahay, taasi ay keeni karto dagaallo mustaqbalka.
“Uganda waa waddan aan bad lahayn, laakiin aaway badeennu? Badeennu waa Badwaynta Hindiya. Anigu dabaqa sare ayaan deganahay, marka ma odhan kartid bada waxa iska leh kuwa dabaqa hoose oo keliya – taasi waa waali,” ayuu yiri Museveni.
Uganda ayaa hore u qorsheysay in ay dhisto tubo shidaal oo ka bilaabmaysa Hoima illaa dekedda Tanga Port ee dalka Tanzania balse hadda waxa uu u muuqdaa inuu doorbidayo inuu marin toos ah ka helo Badda Hindiya, xitaa haddii ay taasi keenayso xiisad.
Musaveni ayaa muujiyay caro uu ka qabo waxa uu ugu yeeray “bakhaylnimada” qaar ka mid ah dalalka xeebaha leh, isagoo sheegay in dekedaha iyo baddaha ay tahay in ay ka wada faa’iidaystaan dhammaan dalalka qaaradda Afrika.
Museveni ayaa u muuqda in uu si gaar ah ula hadlayo Kenya, oo uu ka heli karo jidka ugu dhow ee dalkiisa ku xiri kara badweynta India.
Hadallada madaxda sare ee Uganda ayaa imanaya xilli dowlada Itoobiya, oo iyaduna aan bad lahayn, ay raadinayso marin badeed. Itoobiya ayaa sannadkii hore heshiis la gashay Somaliland si ay uga hesho marin badeed, inkasta oo heshiiskaasi uu fashilmay markii ay ka hor timid DF Somalia.
