Shirka wada-tashiga siyaasadeed ee u dhexeeya Madaxda Dowladda Federaalka Soomaaliya iyo Golaha Mustaqbalka Soomaaliya ayaa la filayaa inuu noqdo kulan si weyn isha loogu hayo, maadaama uu ku soo aadayo xilli siyaasadeed oo xasaasi ah.
Shirkaas oo ay si gaar ah uga qeyb galayaan Madaxweynaha Puntland Siciid Cabdullaahi Deni iyo Madaxweynaha Jubaland Axmed Maxamed Islaam (Axmed Madoobe), ayaa lagu wadaa in lagu qabto gudaha xerada Xalane ee magaalada Muqdisho, taas oo ah goob si gaar ah loo adkeeyay ammaankeeda.
Ilo wareedyo rasmi ah oo aan la xiriirnay ayaa xaqiijiyay in wafuudda ka imaanaysa Puntland iyo Jubaland ay degi doonaan gudaha Garoonka Diyaaradaha Aadan Cadde ee Muqdisho, halkii ay ka degi lahaayeen hoteello ama xarumo kale oo ku yaalla caasimadda.
Tallaabadan ayaa loo arkaa mid si toos ah ula xiriirta adkeynta ammaanka iyo nidaam gaar ah oo loo dejiyay shirka, maadaama madaxdan ay horey u muujiyeen walaac dhanka amniga ah marka ay imaanayaan Muqdisho sababo la xiriira khilaafka gaamuray ee kala dhexeeya madaxda sare ee DF.
Qabsoomidda shirka iyo halka lagu qabanayo ayaa sidoo kale muujinaysa kaalinta ay beesha caalamku ku leedahay dadaallada wada-tashiga siyaasadeed ee Soomaaliya.
Dowladaha Ingiriiska, Mareykanka iyo Qaramada Midoobay ayaa si gaar ah u dardargelinaya in shirkaasi uu miro dhalo, islamarkaana laga gaaro natiijooyin wax ku ool ah oo wax ka tari kara ismariwaaga siyaasadeed ee u dhexeeya Dowladda Federaalka iyo qaar ka mid ah Dowlad-goboleedyada.
Ajendaha shirka ayaa la filayaa inuu diiradda saaro qodobo ay ka mid yihiin:
1-Khilaafaadka siyaasadeed ee u dhexeeya dowladda dhexe iyo dowlad-goboleedyada
2-Arrimaha doorashooyinka iyo habraacyada lagu heshiin karo
3-Amniga guud iyo wada-shaqqeynta la dagaallanka Al-Shabaab
4-Mustaqbalka wada-tashiga qaran iyo doorka Dowlad-goboleedyada
Dadka falanqeeya siyaasadda Soomaaliya ayaa aaminsan in shirka Xalane uu noqon karo mid fure u ah dib u heshiisiinta siyaasadeed, haddii ay madaxdu muujiyaan tanaasul iyo diyaar u ahaansho wada-hadal dhab ah. Si kastaba ha ahaatee, waxaa jira shaki ku saabsan sida natiijooyinka shirka loo hirgelin doono, maadaama shirar hore oo la mid ah ay ku dhammaadeen is-afgaranwaa ama fulin la’aan.
Gebagebadii, shirkaan wada-tashiga siyaasadeed waxaa lagu tilmaamayaa mid aad muhiim u ah, iyadoo indhaha gudaha iyo dibaddaba ay ku sii jeedaan natiijada ka soo baxda, taas oo lagu qiyaasi karo jihada siyaasadda Soomaaliya ee bilaha soo socda.
