Madaxweynaha Maraykanka, Donald Trump, ayaa soo saaray hadal adag oo ku saabsan xaaladda marin-biyoodka Marinka Hormuz, isagoo ku dhawaaqay in Mareykanku bilaabi doono tallaabooyin militari oo lagu “xannibayo” maraakiibta isku dayaya inay galaan ama ka baxaan marinkaas muhiimka ah. Hadalkan ayaa si weyn u kiciyay dareenka caalamka, maadaama Marinka Hormuz uu yahay halbowlaha ugu weyn ee maraakiibta shidaalka adduunka.
Qoraal uu ku daabacay barta Truth Social, Trump wuxuu ku sheegay in wada-hadallo dhowaan dhex maray Mareykanka iyo Iiraan ay guud ahaan si wanaagsan u dhaceen, isla markaana qodobo badan la isku afgartay. Si kastaba, wuxuu carrabka ku adkeeyay in qodobka ugu muhiimsan ee la xiriira nukliyeerka Iiraan uusan weli heshiis laga gaarin, taasoo weli caqabad ku ah in xal buuxa la helo.
Trump ayaa sidoo kale sheegay in inkastoo mustaqbalka la gaari karo heshiis ku saabsan marin xor ah oo maraakiibtu isticmaalaan, haddana Iiraan ay hadda diidan tahay arrintaas. Wuxuu ku eedeeyay Tehran inay marmarsiiyo ka dhigatay khataro aan la xaqiijin karin, sida sheegashada ah in miinooyin lagu aasay marinka, taas oo, sida uu sheegay, aysan jirin cid xaqiijin karta marka laga reebo Iiraan lafteeda.
Dhanka kale, Trump wuxuu sheegay inuu amar siiyay ciidamada badda Mareykanka inay tallaabo adag qaadaan, oo ay ku jiraan baarista iyo qabashada maraakiibta lagu tuhmo inay bixiyeen lacag marin ah oo uu ku tilmaamay sharci-darro oo la siiyo Iiraan. Wuxuu sidoo kale xusay in ciidamada badda ay bilaabi doonaan howlgal lagu burburinayo miinooyinka la sheegay in lagu aasay marinnada muhiimka ah.
Ugu dambeyn, Trump ayaa si adag uga digay cid kasta oo isku dayda inay weerarto maraakiibta ama ciidamada Mareykanka, isagoo sheegay in jawaabta ay noqon doonto mid “aad u daran.” Hadalkan kulul ayaa muujinaya heerka sare ee xiisadda militari ee u dhexeysa Mareykanka iyo Iiraan, taasoo khatar gelin karta amniga marin-biyoodka Hormuz iyo xasilloonida guud ee gobolka iyo caalamka.
Wuxuu leeyahay biyo anaga naloo diidey inaan isticmaalno ma jiri doonto dal kale oo isticmaali doona.
Iran ayaa hore fasax u siisay si gaar ah dalalka Shiinaha, India, Ruushka, Pakistan iyo Turkeyga inay maraakiibtooda ka gudbaan marinka Hormuz cabsi la,aan.
