Guddiga Madaxa Bannaan ee Doorashooyinka Qaranka iyo Soohdimaha ayaa si rasmi ah ugu dhawaaqay liiska ururrada siyaasadeed ee ka qeyb geli doona doorashooyinka ka dhacaya Dowlad-goboleedka Koonfur Galbeed Soomaaliya.
Bayaan kasoo baxay guddiga ayaa lagu sheegay in liiskan si gaar ah loola wadaagayo dhammaan bulshada Soomaaliyeed, gaar ahaan shacabka ku dhaqan deegaannada Koonfur Galbeed, si loo xaqiijiyo hufnaan iyo daahfurnaan ku aaddan geeddi-socodka doorashooyinka.
Ururradan siyaasadeed ayaa lagu tartami doonaa degmooyin kala duwan oo ka tirsan dowlad-goboleedka, iyadoo guddigu uu xusay in habraacyada doorashada iyo jadwalka la raacayo si dhow loo ilaalin doono.
Guddigu wuxuu ugu baaqay shacabka inay si firfircoon uga qeyb qaataan doorashooyinka, isla markaana ay doorkooda ka qaataan xoojinta nidaamka dimuqraadiyadeed ee dalka.
Sidoo kale, Guddiga Doorashooyinka ayaa adkeeyay in ay ka go’an tahay hubinta doorasho xor iyo xalaal ah, iyadoo la dhowrayo shuruucda iyo xeerarka u degsan doorashooyinka qaranka.
Doorashooyinkan ayaa la filayaa inay door muhiim ah ka ciyaaraan mustaqbalka siyaasadeed ee Koonfur Galbeed iyo guud ahaan Soomaaliya.
