Golaha Nabadda iyo Ammaanka Midowga Afrika (AU PSC) ayaa si adag u cambaareeyay aqoonsiga halka dhinac ah ee Israel ay siisay maamulka Somaliland intii lagu guda jiray kulankii Wasiirrada ee 1324-aad ee Golaha, isagoo ugu baaqay in si degdeg ah looga laabto tallaabadaas.
Goluhu wuxuu mar kale adkeeyay mowqifkiisa aan leexleexadka lahayn ee ku aaddan ilaalinta madax-bannaanida, midnimada, wadajirka dhuleed iyo xasilloonida Jamhuuriyadda Federaalka Soomaaliya, si waafaqsan Axdiga Aasaasiga ah ee Midowga Afrika, Hab-raaca Golaha Nabadda iyo Ammaanka, iyo Axdiga Qaramada Midoobay.
Sidoo kale, Golaha ayaa carrabka ku adkeeyay in cid ama hay’ad toona aysan haysan awood ama sharci ay ku beddesho qaab-dhismeedka dhuleed ee dal xubin ka ah Midowga Afrika, isla markaana bayaannada noocaas ah ay yihiin kuwo waxba kama jiraan ah marka loo eego sharciga caalamiga ah.
Wasiirka Arrimaha Dibadda iyo Iskaashiga Caalamiga ah, Mudane Cabdisalaam Cabdi Cali, ayaa ka qayb galay kulankan degdeg ah ee Golaha Nabadda iyo Amniga Midowga Afrika (AU PSC), kaasoo ahaa mid ahaa mid Online ah.
Kalfadhigan, oo uu guddoominayay Wasiirka Arrimaha Dibadda ee Jamhuuriyadda Dimuqraadiga ah ee Kongo, Thérèse Wagner oo ah guddoomiyaha AU PSC, ayaa loogu yeeray codsigii Soomaaliya sida ku xusan Qodobka 7(o) ee waajibaadka Golaha, kaas oo u oggolaanaya inay tixgeliso xaaladaha ay halis ku jirto madaxbannaanida qaranka ee waddan xubin ka ah ama madaxbannaanida.
Isagoo la hadlayay Golaha, Wasiir Cabdisalaam ayaa sheegay in Soomaaliya ay diidayso waxa uu ku tilmaamay tallaabooyin hal dhinac ah oo ay Israa’iil ku doonayso inay ku aqoonsato gobolka waqooyi ee Soomaaliya dawlad gaar ah, isagoo ku doodaya in tallaabooyinka noocaas ahi ay ka hor imaanayaan Dastuurka Ku-meel-gaarka ah ee Soomaaliya, Xeerka Dastuurka ee Midowga Afrika iyo Axdiga Qaramada Midoobay.
Wuxuu ku celiyay in Soomaaliya ay tahay waddan madaxbannaan oo keliya, oo aan la qaybin karin, gobolka Somaliland-na uu weli qayb muhiim ah ka yahay Jamhuuriyadda Federaalka Soomaaliya. Wuxuu intaas ku daray in uusan jirin cid dibadda ka socota oo awood sharci ah u leh inay beddesho qaab-dhismeedka dhuleed ee waddan xubin ka ah Midowga Afrika.
Wuxuu sidoo kale iftiimiyay taageerada muddada dheer ee Midowga Afrika u hayo dadaallada nabadda iyo dhismaha dowladnimada Soomaaliya, isagoo xusay horumarradii siyaasadeed iyo kuwa hay’adeed ee ugu dambeeyay, oo ay ku jirto qabashada xilka madaxweynenimada ee Golaha Amniga ee Qaramada Midoobay bishaan.
