Waxaa isa soo taraya calaamado siyaasadeed oo muujinaya in uu jiro kala fogaansho u dhexeeya Madaxweynaha Mareykanka Donald Trump iyo Ra’iisul Wasaaraha Israa’iil Benjamin Netanyahu, xilli khilaafyo culus ay ka taagan yihiin sida loo maareynayo dagaallada Bariga Dhexe, gaar ahaan Lubnaan.
Trump ayaa xoogga saarayo in la xakameeyo faafitaan colaadaha iyo in la raadiyo waddooyin diblomaasiyadeed oo lagu dejin karo xiisadda gobolka. Dhanka kale, Netanyahu ayaa sii wada cadaadiska militari ee ka dhanka ah Hezbollah, taas oo Israa’iil u aragto khatar amni oo toos ah.
Warbixinno siyaasadeed oo kala duwan ayaa tilmaamaya in sirdoonka Mareykanka uu soo jeediyay qiimeynno adag oo saameyn ku yeeshay fahamka Washington ee xaaladda gobolka, kuwaas oo qaarkood loo fasirtay in ay kordhiyeen xiisadda siyaasadeed ee u dhexeysa labada dhinac.
Madaxweyne ku xigeenka Mareykanka JD Vance ayaa dhankiisa si toos ah uga digay talaabooyinka Israa’iil, isagoo ku adkeeyay in Mareykanku uusan sii wadi doonin taageerada difaaca, isla markaana hubka Israel isku difaacdo Maraykanku soo saaro.
Falanqeeyayaal ayaa sheegaya in isku darka cadaadiska diblomaasiyadeed, farriimaha adag ee Washington, iyo khilaafaadka istiraatiijiga ah ay abuureen jawi muujinaya kala fogaansho sii kordhaya oo u dhexeeya labada xulafada ah, inkastoo xiriirkooda milatari uu weli yahay mid xooggan.
Wasiiradda xagjir ah ee Israel ayaa dhankooda Trump ku eedeeyay in uu u hogaansamay waxa ay ugu yeereen cadowga Israel ee Pakistan, Qatar, Turkey, Sucuudiga iyo Masar.
