Turkiga iyo Pakistan ayaa taliyeyaashooda ugu sarreeya ciidamada u diraya Sacuudi Carabiya, kadib markii Riyadh ay codsatay kulan degdeg ah oo looga arrinsanayo hirgelinta heshiis difaac wadajir ah, xilli weerarrada gantaallada iyo diyaaradaha aan duuliyaha lahayn ee Xuutiyiinta Yemen ay sii kordhayaan.
Wasaaradda Difaaca Turkiga ayaa Jimcihii xaqiijisay in taliyaha guud ee ciidamada, General Selcuk Bayraktaroglu, uu u safrayo Sacuudi Carabiya si uu uga qeyb galo kulanka taliyeyaasha ciidamada ee dalalka ku mideysan heshiiska difaaca.
Taliyaha ciidamada Pakistan, Field Marshal Asim Munir, ayaa sidoo kale la filayaa inuu gaaro Riyadh, sida ay Al Jazeera sheegtay, inkastoo milatariga Pakistan uusan si rasmi ah u xaqiijin safarkiisa.
Kulanka ayaa imanaya kadib toddobaadyo ay Xuutiyiintu kordhiyeen weerarrada ay ku qaadayaan gudaha Sacuudi Carabiya, taas oo Riyadh ku riixday inay taageero ka raadiso xulafadeeda cusub ee heshiiska difaaca.
Khamiistii, Xuutiyiintu waxay sheegeen inay gantaallo iyo diyaarado drone ah ku weerareen bartilmaameedyo Sacuudi ah, oo ay ku jiraan xarumo ay leedahay shirkadda shidaalka ee Saudi Aramco ee Yanbu iyo goob ay ku tilmaameen “bartilmaameed xasaasi ah” oo ku yaalla Riyadh.
Sacuudi Carabiya ayaa dhankeeda sheegtay inay soo ridday lix gantaal oo ballistic ah oo ku wajahnaa Taif iyo Yanbu. Digniino degdeg ah ayaa sidoo kale laga bixiyey dhowr magaalo, iyadoo colaadda Yemen ay si isa soo taraysa uga gudbeyso xadka.
