Pope Francis, hoggaamiyihii ugu horreeyay ee u dhashay Latin America ee Kaniisadda Rooman Katooliga, ayaa geeriyooday, sida lagu sheegay bayaan muuqaal ah oo ay Vatican-ku baahisay Isniinta maanta ah.
Geeridiisa waxay soo afjartay hoggaan ay hareeyeen muranno iyo isbeddel raadad reebay oo uu ku doonayay in uu dib u habeeyo hay’addan qadiimiga ah.
Pope-ka wuxuu geeriyooday isagoo 88 jir ah, wuxuuna hore uga bogsaday xanuun daran oo oof-wareen laba-laab ah.
“Walalaha qaaliga ah, waxaa murugo weyn igu tahay inaan idinku dhawaaqo geerida Pope Francis,” ayuu yiri Cardinal Kevin Farrell oo ka hadlayay telefishinka Vatican-ka.
“Saaka 7:35 subaxnimo, Bishop-kii Rome ee Francis ayaa dib ugu laabtay gurigii Aabbaha.”
Geeridiisa ayaa timid hal maalin kadib markii uu mar kale si buuxda uga soo hor muuqday dadweynaha tan iyo markii isbitaalka laga soo saaray 23-kii Maarso, kadib 38 maalmood oo uu la il-darnaa oof-wareen.
Axaddii oo ku beegnayd maalinta Easter-ka, Pope-ka wuxuu gudaha u galay Fagaaraha St. Peter’s isagoo saarnaa baabuurkiisa furan, wax yar kadib duhurkii, isaga oo si diirran u salaamayay dadweynihii farxadda ku soo dhoweeyay.
Jorge Mario Bergoglio waxaa loo doortay Pope 13-kii Maarso 2013, arrin dad badan la yaabeen maadaama lagu yaqaanay inuu u janjeero u adeegidda dadka saboolka ah, taasoo ka dhigtay mid aan si fudud loogu tirin dadka ugu cadcad.
Markii uu xilka la wareegay, kaniisadda Roma Catholic waxaa haysay fadeexad la xiriirta tacaddiyo galmo oo loo geystay carruur, iyadoo sidoo kale ay jireen khilaafaad xoogan oo ka dhex jiray maamulka Vatican. Waxaa loo doortay si uu u soo celiyo nidaamka iyo kalsoonida.
Laakiin intii uu xilka hayay, wuxuu la kulmay dhaleecayn culus oo uga timid garabka muxaafidka ah, kuwaasoo ku eedeeyay inuu burburinayo dhaqamadii soo jireenka ahaa. Isla markaana, horumariyeyaasha kaniisadda ayaa dhaliilay waxa ay u arkayeen in Pope-ku uusan si ku filan u hirgelin isbeddel lagu cusbooneysiinayo kaniisadda 2,000 sano jirtay.
Iyadoo uu la tacaalayay khilaafaadka gudaha, Francis wuxuu noqday shakhsiyad caan ah oo caalami ah, isagoo dad tiro badan kusoo jiitay safaradiisii caalamiga ahaa. Wuxuu si xooggan u horumariyay wada-hadalka diimeed, nabadda, iyo taageeridda dadka la takooro – gaar ahaan muhaajiriinta.
Muddadii uu xilka hayay, Vatican-ku waxay martigelisay laba Pope oo labaduba xiran dharka caddaanka ah: Francis iyo Benedict – kaasoo xilka ka degay 2013 si lama filaan ah, balse doortay inuu sii joogo gudaha Vatican. Benedict, oo caan ku ahaa aragtidiisa muxaafidka, ayaa geeriyooday December 2022, taasoo ka dhigtay Francis Pope-ka kaliya ee xilka haya.
Francis wuxuu magacaabay ku dhowaad 80% xubnaha cardinal-ka codkooda dhiiban doona doorashada Pope-ka xiga, taasoo sare u qaadaysa suurta-galnimada in hoggaamiyaha beddela uu sii wado siyaasadaha isbeddelka ku saleysan – inkasta oo ay jiraan xoogag adag oo kasoo horjeeda dhaq-dhaqaaqyadaas.
