Guddoomiyahii degaanka Hees oo hoos taga degmada Matabaan ee gobolka Hiiraan Cabdullaahi Bilig ayaa caawa lagu dilay magaalada Belad-weyne
Sida wararku sheegayaan dabley Bastoolado ku hubeysan ayaa waxay marxuumka ku dileen xaafadda Xaawa-Taako ee magaalada Beledweyne sida dad goob joogayaal ah ay u sheegeen warbaahinta.
Booliska Beledweyne oo ku dhowaa goobta dilku ka dhacay ayaa markiiba gaaray halkaas, waxaana goobtaas ka dhacay iska horimaad dhexmaray Booliska iyo raggii dilka geystay.
Intii ay socotay rasaasta labada dhinac dhexmartay waxaa la maqlay dhowr qarax oo ka dhashay bam gacmeedyo ay adeegsanayeen, dableyda la dagaalantay ciidamada Booliska.
Saraakiil ka tirsan Booliska magaalada Belad-weyne ayaa sheegay in iska horimaadkaas lagu dilay nin ka mid ah dableyda dilka fulisay, waxaana weli socda howlgalo ciidamadu wadaan oo lagu baadi goobayo dableyda kale ee baxsatay.
