Golaha Ammaanka ee Qaramada Midoobay ayaa qaaday tallaabo culus oo ka dhan ah afar sarkaal oo ka tirsan ururka RSF, kaddib eedeymo la xiriira xadgudubyo baahsan oo ka dhacay gobolka Darfur ee dalka Sudan.
Tallaabadan waxaa si rasmi ah u ansixiyay Golaha Ammaanka ee Qaramada Midoobay, iyadoo lagu saleeyay warbixino ka yimid guddi-raadraacayaal iyo hay’ado caalami ah oo xaqiijiyay in rabshado iyo tacaddiyo culus ay ka dhaceen gaar ahaan magaalada Al-Fashir iyo deegaanno kale oo ka tirsan Darfur.
Saraakiisha la saaray cunaqabateynta
Cabdulraxiim Xamdaan Daqlo – Ku-xigeenka Taliyaha Guud ee Rapid Support Forces (RSF), isla markaana ah walaalka hoggaamiyaha guud ee ururka. Waxaa lagu eedeeyay inuu door muuqda ku lahaa qorsheynta iyo fulinta howlgalada militari ee lagu beegsaday rayidka.
Cali Yacquub Gibril – Taliye sare oo hoggaaminayay howlgallada RSF ee Al-Fashir. Warbixinadu waxay sheegayaan in ciidamo uu maamulayay lagu eedeeyay inay ku lug lahaayeen duqeymo iyo weerarro sababay khasaaro rayid.
Cusmaan Maxamed Xamiid Maxamed – Sarkaal sare oo ka tirsan taliska howlgalada RSF, laguna eedeeyay inuu gacan ka geystay isku dubbaridka dhaq-dhaqaaqyada milatari ee lagu bartilmaameedsaday deegaanno rayidku ku badan yahay.
Cabdullaah Maxamed Xasan – Hoggaamiye sare oo lagu eedeeyay ku lug lahaanshaha rabshado iyo xadgudubyo ay ka mid yihiin dilal, barakicin khasab ah iyo burburinta hanti dadweyne oo ka dhacay Darfur.
Cunaqabateyntan ayaa ka kooban laba qodob oo waaweyn:
Xayiraad safar – Afarta sarkaal waxaa laga mamnuucay inay u safraan dalalka xubnaha ka ah Qaramada Midoobay.
Xayiraad hantiyeed – Hantida ay ku leeyihiin dibadda ayaa la qaboojiyay, waxaana laga mamnuucay inay ka faa’iideystaan nidaamka maaliyadeed ee caalamiga ah.
Golaha Ammaanka wuxuu sheegay in go’aankan uu yahay mid lagu xoojinayo isla xisaabtanka, laguna cadaadinayo dhinacyada dagaallamaya inay joojiyaan tacaddiyada ka dhanka ah shacabka. Gobolka Darfur ayaa muddo dheer ahaa goob ay ka dhacaan colaado salka ku haya loollan awood, qabiil iyo siyaasad, taasoo sii xoogeysatay kaddib dagaalka u dhexeeya ciidamada dowladda Suudaan iyo RSF.
Hay’adaha xuquuqul insaanka ayaa ku eedeeyay RSF iyo dhinacyo kale labadaba xadgudubyo culus, inkastoo RSF ay marar badan beenisay eedeymaha loo jeediyay.
Tallaabadan ayaa la filayaa inay: Kordhiso cadaadiska caalamiga ah ee saaran hoggaanka RSF, Saameyn ku yeelato dhaqdhaqaaqa maaliyadeed iyo diblomaasiyadeed ee saraakiishan, Fariina u dirto dhinacyada kale ee ku lugta leh colaadda in beesha caalamku si dhow ula socoto xaaladda.
