Madaxweynaha Dawladda Federaalka Soomaaliya, Xasan Sheekh Maxamuud ayaa maanta furay Kalfadhiga labaad ee Baarlamaanka dalka, kaas si wadajir ah uga furmay xarunta KMG ah ee Golaha Shacabka BJFS ee Villa Hargeysa.
Madaxweyne Xasan Sheekh Maxamuud ayaa ka jeediyay Xildhibaanada labada aqal hortooda khudbaddiisa Dastuuriga ah, isagoo diirada saaray guulaha laga gaaray halganka dalka looga xoreynayo argagixisada Al-Shabaab, marxaladaha amni, dhaqaale, siyaasadeed iyo Beni-aadannimo ee ku gadaaman dalkeenna.
“Maanta Dalkeena iyo dadkeennuba waxay ku sugan yihiin meel aan ka noqosho laheyn, meel guuldarradu aanay boos uga bannaaneyn. Waxaan go’aansannay inaan u guntanno dagaalka dalka looga sifaynayo khawaarijta. Waan soo waayay jid aan ahayn in aan difaacno karaamadeenna , islaanimadeena iyo qaranimadeena” ayuu yiri Madaxweynaha Soomaaliya.
Xasan Sheekh, ayaa intaa ku daray “Geba-gabada halganka maanta socda wuxuu dhali doonaa Aabayaasha Soomaaliyada cusub iyo geesiyaal ay Taariikhda xusi doonto, Sidaas darteed hoggaamiyeyaasha maanta waa inagee, yaanay fursadan ina seegin.”
