Saaka waxaa degaanka Miirdugul oo kamid ah degaannada hoostaga Magaalada dhuusamareeb uu dagaal culus ku dhex-maray Ciidamada Dowladda iyo xubno ka tirsan Ururka Al-Shabaab, kaas oo geystay khasaaro isugu jira dhimasho iyo dhaawac.
Dagaalka ayaa waxaa uu ka dambeeyay, kadib markii Ciidamo ka tirsan guutada 15aad qeybta 21aad ee ka howlgasha degaannada Galmudug ay weerar ku qaadeen Bariga degaanka Miirdugul, halkaas oo ay ku sugnaayeen xubno ka tirsan Al-Shabaab, waxaana dhacay dagaal geystay khasaaro isugu jira dhimasho iyo dhaawac.
Khasaaraha ilaa iyo hadda la xaqiijiyay dagaalka ka dhacay degaanka Miirdugul ee duleedka Dhuusamareeb ayaa waxaa uu yahay geerida askari ka tirsan Ciidamada dowladda, kaas oo lagu Magacaabi jiray Cabdi Cali Hore halka tiro kale ay ku dhaawacmeen.
Saraakiil ka tirsan Ciidamada Dowladda gaar ahaan guutada 15aad qeybta 21aad ayaa waxaa ay sheegeen in Ciidamada ay la wareegeen fariisinki Al-Sabaab sidoo kale ay kusii siqayaan degaano kale.
Waxaa ay sheegeen in weli howlgalka uu socdo, isla markaana ay wadayaan ilaa iyo inta ay deegaannadaas ka saarayaan Al-Shabaab.
