Dowlada Mareykanka ayaa si ula kac ah u kansashay viisayaashii ay Mareykanka ku tagi lahaayeen Madaxweynaha Dalka Falastiin Maxamuud Cabbaas iyo wafdigiisa kuwaasoo ka qeybgeli lahaa shirweynaha Qaramada Midoobe ee sanad kastaba mar ay yeeshaan Madaxda Caalamka.
Wasaaradda Arrimaha Dibadda ee Mareykanka ayaa cadeysay inay ka hor istaageen Shirka Qaramada Midoobe Madaxweyne Maxamuud Cabaas iyo 80 falastiiniyiin ah oo wafdigiisa ka mid ahaa xili Isra’iil -na aad ugu farxeen soona dhaweeyeen.
Xoghayaha Arrimaha Dibadda ee Mareykanka, Marco Rubio oo sharaxayay sababta ay talaabadaani u qaadeen ayaa ku dhaliilay mas’uuliyiinta reer Falastiin inay rabaan in si kali-talisnimo ah loo aqoonsado dowlad Falastiini ah,wuxuu sidoo kale ku eedeeyay inay caqabad ku yihiin dadaallada nabadda.
Lama oga sida ay dalalka Islaamka u aqbali doonaan talaabada Mareykanku qaaday madaama ay ahayd Mareykanku u sahlo dhamaan madaxda caalamka ee dooneysa inay ka qeybgalaan shirka Qaramada Midoobe.
Go’aanka Madaxweynaha Falastiin Maxamuud Cabaas loogu diiday inuu ka qeybgalo shirka Qaramada Midoobe ayaa ku soo aaday xili Dalka Faransiisku hor-kacayo dadaallo caalami ah oo lagu doonayo in lagu aqoonsado dowlad Falastiin leedahay iyagoo doonayay inay shirkaan uga fa’iideystaan.
Si kastaba madaama Madaxweyne Trump hore u cadeeyay inuu ka soo hor jeedo Dowlad Falastiin leedahay in caalamku aqoonsado ayaa tani waxay cadeyneysaa inuu yahay qorshe Trumo uu ka danbeeyo si uu suurad xumeeyo dadaalada dalalka reer Yurub ee Faransiisku horkacayo kaasoo ay doonayeen inay shirka sanadkaan ka iibiyaan madaxda caalamka in Dunidu aqoonsato Dowlad Falastiin leedahay.
