Mareykanka ayaa ku eedeeyey ciidamada Tigray ee TPLF inay tacadiyo ka geysteen gobollada Axmaarada iyo Canfarta ee dalka Itoobiya
Afhayeenka Wasaaradda arrimaha dibadda Mareykanka Ned Price ayaa sheegay in tacadiyo iskugu jira dil wadareed, kufsi iyo burbur laga geystay degaanada Axmaarada iyo Canfarta
“Waaxdu waxay ku boorisay dhammaan kuwa hubaysan inay joojiyaan xadgudubyada ka dhanka ah dadka rayidka ah, waxayna ku boorisay maamulka inay baaritaan ku sameeyaan eedeymaha.”ayuu yiri afhayeenku
Hay’adda Xuquuqda Aadanaha ee Human Rights Watch ayaa sheegtay in ciidamada Tigray ay tobanaan qof oo rayid ah toogteen.
Goob joogayaal ayaa u sheegay baarayaasha HRW inay arkeen dagaalyahanada Tigray ee tuulooyinka Chenna iyo Kobo ku dilay 49 qof oo rayid ah.
Dilalka dadka rayidka ah ayaa dhacay intii u dhaxaysay 31 Ogosto iyo 9 Sebtembar ee sanadkan, ayay tiri hay’adda xuquuqda aadanaha u dooda.
Human Rights Watch ayaa ugu baaqday QM in la sameeyo baaritaan caalami ah oo lagu ogaanayo dadka ka dambeeya dambiyada dagaalka iyo in la baaro xadgudubyada ay geystaan dhammaan dhinacyada ku dagaalamaya.
