Mareeg Lubnaan laga leeyahay oo taageerta ururka Xizbullah ayaa daabacday warbixin ay ugu magac dartay “kaarka bartilmaameedka”, taas oo ku saabsan xarun militari oo ku taalla magaalada Boosaaso, xilli Puntland ay sheegtay in Mareykanku qorsheynayo inuu ballaariyo joogitaankiisa xaruntaas.
Mareegta Al-Khanadeq ayaa warbixinta daabacday 26-kii Agoosto, iyadoo si gaar ah u soo bandhigtay goobta istaraatiijiga ah ee Boosaaso, oo ku taalla xeebta Gacanka Cadmeed, kana soo horjeedda Yemen, isla markaana u dhow marin-biyoodka muhiimka ah ee isku xira Gacanka Cadmeed iyo Baabul Mandab.
Al-Khanadeq ayaa sheegtay in haddii la ballaariyo xarunta, ay noqon karto “saldhig hawlgallo” oo Mareykanku ka fuliyo hawlgallo cirka ah iyo kuwa saadka.
Waxay sidoo kale soo jeedisay suurta-galnimada in mustaqbalka xarunta loo adeegsan karo waxa ay ku tilmaantay “falal gardarro ah oo ka dhan ah Yemen”.
Hase yeeshee, mareegtu ma aysan soo bandhigin wax caddeyn ah oo muujineysa in Washington ay qorsheyneyso inay Boosaaso uga duusho weerarro ka dhan ah Yemen.
Sidoo kale ma aysan shaacin weerar lagu hayo xaruntaas, mana aysan sheegin in Xizbullah ama kooxda Xuutiyiinta Yemen ee Iran taageerto ay go’aan ku gaareen inay bartilmaameedsadaan.
Al-Khanadeq waxay isku tilmaantaa madal madax-bannaan oo ka faalloota arrimaha juqraafi-siyaasadeed, militari iyo amni. Hase yeeshee, cilmi-baarayaal ayaa ku tilmaamay khadkeeda tifaftirka mid si dhow ula jaanqaada Xizbullah iyo kooxaha Iran taageerto ee loo yaqaan “tiirka iska-caabbinta”, inkastoo aysan ahayn warbaahin rasmi ah oo Hezbollah leedahay.
